09 Qyrkúıek, 2021 NEWS О́zgertý

"Jaǵdaı qıyn". SQO-da kenshiler 11 kúnnen beri ashtyq jarııalaýda (vıdeo)

Foto: Vıdeodan skrınshot

Soltústik Qazaqstan oblysynda Taý-ken baıytý kombınatynyń qyzmetkerleri 11 kúnnen beri ashtyq jarııalap jatyr. Kenshilerdiń sózinshe, Obýhov taý-ken baıytý kombınatyn bireýler reıderlik jolmen basyp almaqshy. Osylaısha narazylyqqa shyqqan jumysshylar tabyssyz qalamyz ba dep alańdaýly.

Qazirgi ýaqytta kombınattyń 4 jumysshysy 11 kúnnen beri ashtyq jarııalap otyr. Jumysshylar reseılik aksıonerleri sanalatyn "Bashqurt soda" kompanııasy zaýytty bankrotqa jetkizip, sosyn ony basqa sheteldikterge satyp, tolyqtaı solardyń basqarýyna berýdi kózdep otyr.

Búginde ken orny qyzmetkerleri jalaqylaryn áli kúnge deıin ala almaı álek. О́ıtkeni Reseı men Qytaıǵa eksporttalýǵa tıis "sırkonıı" konsentraty satylmaı keledi. Al ony jergilikti polısııa esh sebepsiz reıderlik áreketpen tárkilep áketip jatyr, deıdi kombınat qyzmetkerleri.

– Aksıoner sanalatyn reseılik olıgarhtardyń maqsaty kompanııany bankrottyq jaǵdaıǵa jetkizý. Sosyn ony basqa shetel ınvestorlaryna is júzinde qymbatqa satý, al ózderi qaǵaz júzinde bankrottyqtyń aldynda turǵan kombınatty óte arzanǵa sattyq deýi de múmkin. Aınalyp kelgende reseılik aksıonerlerdiń maqsaty osy bolyp tur, – deıdi advokat Abzal Quspan.

О́ndiristi múldem toqtatyp tastaý úshin áldekimder kombınattaǵy elektr energııasyn sóndirip tastaǵan. Ashynǵan halyq kompanııa basshylaryna talaptaryn aıtyp, ashtyq jarııalaýdy jalǵastyrýda.

– Sybaılas jemqorlyqqa jol joq. Bizdiń máselemizge nazar aýdarmaıynsha ashtyqty jalǵastyra beremiz. Ashtyqqa daıynbyz, – deıdi jumysshylar.

Kombınatta qyzmet etip, adal asyn taýyp otyrǵan 500-ge jýyq qyzmetker Nur-Sultanda beıbit mıtıng ótkizbek bolǵan. Biraq, polısııa olardy aýyldan shyqqan boıda ustap áketken. Kompanııa basshylyǵy muny ákimdik pen reseılik quryltaıshylardyń ádeıi jasap jatqan isi dep topshalady.

– Bizben 10 jyldan astam ýaqyt seriktes bolǵan reseılik kompanııa ózimizdiń "Tioline" kompanııasyn álsiretip, tolyqtaı óz qaramaǵyna ótkizip alǵysy kelip otyr. Quryltaıshylardyń ondaǵy negizgi maqsaty – aktıvterdi reseılik iri "Bashqurt soda" kompanııasyna satý. Bul degenemiz – Qazaqstan óziniń myqty taý-ken ornyn sheteldikterge qoldan bere salady degen sóz, – deıdi kompanııanyń atqarýshy dırektory Vıktor Dolgalev.

Obýhov taý-ken baıytý kombınatynyń jumysshylary narazylyq bildirip, máselege memlekettik organdar nazar aýdarýyn suraıdy.