Murat Áıtenov ustazdardy jańa oqý jylymen quttyqtady

Shymkent qalasynyń ákimi Murat Áıtenov qala pedagogtarynyń dástúrli tamyz konferensııasynda ustazdardy jańa oqý jylymen quttyqtady. Jıynǵa qala ákimimen birge Shymkent qalasy máslıhatynyń hatshysy B.Narymbetov, «Nur Otan» partııasy Shymkent qalasy fılıaly tóraǵasynyń birinshi orynbasary J.Bektaeva, qalalyq máslıhat depýtattary qatysty.

Qala mektepteriniń dástúrli oqý formatyna daıyndyǵyn atap ótken qala basshysy balalardyń densaýlyǵyn saqtaý birinshi kezektegi másele ekendigine kóńil bóldi. Qala ákiminiń aıtýynsha, zııatker urpaq tárbıeleý basty strategııalyq mindet bolyp belgilengen. Bilim salasynda maqsatty ındıkatorlyq kórsetkishter qoıylyp, adamı kapıtaldyń sapasyn arttyrý mindetteri mejelengen.

Bul baǵytta Memleket basshysynyń tapsyrmasyna sáıkes, bilim berý uıymdarynyń qurylysyn júrgizý, olardyń jabdyqtalý deńgeıin arttyrý, bilim salasynda memlekettik-jekemenshik áriptestikti jolǵa qoıý, pedagog kadrlardyń áleýetin kóterý, taǵy basqa mańyzdy kórsetkishter qamtylǵan.

Aldaǵy 5 jylda qalada 72 mekteptiń qurylysyn júrgizý josparlanyp, úsh aýysymdy mektepter máselesi men mektebi joq shaǵynaýdandar men turǵyn alaptarda jańa mektepter salynbaq. Bıyldyń ózinde 32 mekteptiń qurylysy bastalyp, 20 mektep jyl sońyna deıin iske qosylmaq. 16 mekteptiń qurylysyna jeke ınvestorlar tartylǵan. Maqsatty kórsetkishterge qol jetkizýde qalalyq máslıhat ta qoldaý kórsetip keledi.

Bilim salasyna memleket tarapynan qamqorlyq jyl sanap artyp otyrǵandyǵyn málimdegen qala basshysy, pedagogtardan tek bilim sapasyn arttyrý ǵana kútiletinin aıtty. Oqýshylarymyz bilim olımpıadalary men ulttyq testileý kórsetkishterinen oq boıy ozyq turýy kerek. Búgin mektebine úles qosqan bala, erteń eline úles qosatyn bolady. Zııatkerlik báseke ornyqqan búgingideı kezeńde balalarymyz ózderin kúndelikti jetildirýi tıis.

Ustazdardy balalarymyzdy jan-jaqty damytýǵa shaqyramyn. Bilim sapasy synalatyn qazirgi ýaqyt ustazdar biliktiligin de únemi shyńdaýdy talap etetindigin atap ótkim keledi. Kásibı turǵyda daıyndyǵy myqty pedagog qaı kezde de joǵary suranysta bolady.
Mekteptiń bala tárbıesindegi roline toqtalǵan qala ákimi, oqýshylardyń qosymsha bilimmen, tárbıe sharalarymen qamtýdyń mańyzy zor ekenin aıtty. Bul baǵytta sporttyq jáne shyǵarmashylyq úıirmeler jandanyp jatqandyǵyn, balalarymyzdyń jan-jaqty damýy úshin barlyq múmkindikter qarastyrylǵanyn atap ótti. Synyp jetekshilerine osy múmkindikterdi tıimdi paıdalanýǵa shaqyrdy.

Tehnologııalyq múmkindikter turmysymyzdy barynsha ońaılastyryp jatqandyǵyn atap ótken qala basshysy, ınternet keńistiktiń bala tárbıesine teris yqpal etetin faktorlaryn da eskerýdi surady. Balalardy kıberkeńistiktegi nashaqorlyq bıznesinen barynsha qorǵap, olardyń áleýmettik jelidegi belsendiligin baqylaýda ustaýdy tapsyrdy.

Murat Dúısenbekuly kolledjder eńbek naryǵyna qajetti tehnıkalyq mamandar daıarlaýdyń ortalyǵy bolýy tıis ekendigin atap ótti. Bul baǵytta sala jetekshilerine qala kolledjderinde qurylysshy mamandyqtar boıynsha kadrlar daıarlaýdy tapsyrdy.
Jıyndy qorytyndylaǵan qala ákimi berilgen tapsyrmalar qalanyń bilim sapasyn jańa deńgeıge shyǵarady degen senimin bildirdi.