Jambyldaǵy jarylystan qaza tapqandar sany 13-ke jetti

Jambyl oblysyndaǵy jarylystan qaza tapqandar sany 13-ke jetti, dep habarlady tótenshe jaǵdaılar mınıstrligi. 

Jambyl oblysynda jarylys bolǵan aýmaqta  taǵy bir adamnyń denesi tabyldy. Onyń jeke basy anyqtalyp jatyr.

Jarylys kezinde tótenshe jaǵdaılar mınıstrliginiń 50-ge jýyq qyzmetkeri túrli dárejede dene jaraqatyn alǵan.

26 tamyz kúni keshki ýaqytta Jambyl oblysynyń áskerı bólimindegi qoımalardyń birinde jarylys bolǵan. Saldarynan jalpy sany 13 adam qaza tapty. Olardyń arasynda órt sóndirýshiler, tótenshe jaǵdaı mınıstrliginiń, áskerı bólimniń, áskerı kúzet pen áskerı prokýratýranyń qyzmetkerleri bar. Áskerı bólimnen jarty shaqyrym jerdegi Qaınar aýylyndaǵy úıler búlingen.