29 tamyz – jalpyulttyq aza tutý kúni dep jarııalandy

Jambyl oblysy Baızaq aýdanyndaǵy jarylysqa baılanysty 29 tamyz jalpyulttyq aza tutý kúni dep jarııalandy. Bul týraly prezıdent Qasym-Jomart Toqaev twitter paraqshasynda málimdedi. 

"Jambyl oblysy Baızaq aýdanyndaǵy adam ólimine ákep soqtyrǵan qaıǵyly oqıǵaǵa baılanysty 29 tamyzdy Jalpyulttyq aza tutý kúni dep jarııalaımyn. Qaza bolǵan áskerı qyzmetshiler men qutqarýshylar eren erlik pen naǵyz janqııarlyq kórsetti. Erlerimizdiń esimi el jadynda  máńgi saqtalady" dedi  Toqaev. 

26 tamyzda Jambyl oblysy Baızaq aýdanynda ornalasqan áskerı bólimdegi oq-dári qoımalarynyń biri órtenip, birneshe jarylys bolǵan.

Jarylystan jalpy sany 12 adam qaza taýyp, 98 adam jaraqat alǵan. Joǵalǵandar da bar. Olardy izdestirý jumystary jalǵasyp jatyr.