"Kómek kórsetiledi". Saparbaev málimdeme jasady

Jambyl oblysynyń ákimi Berdibek Saparbaev qazirgi ýaqytta Taraz mańyndaǵy jarylystar toqtaǵanyn jáne turǵyndarǵa úıine qaıtýǵa bolatynyn habarlady. 

Saparbaev Jambyl oblysy Baızaq aýdanynda jarylys saldaryn joıý, keltirilgen zalaldy anyqtaý jáne qalpyna keltirý jumystary júrgizilip jatqanyn aıtty.

Ákimniń sózinshe, barlyq memlekettik organ ókilderinen aımaqtyq jedel-shtab qurylǵan. Jarylys bolǵan jerge jaqyn mańda úsh aýyl bar.

– Eń jaqyny Qaınar aýyly bir shaqyrym jerde ornalasqan. Qalǵan ekeýi bes shaqyrym qashyqta. Bul eldi mekenderdiń barlyq turǵyny arnaıy daıyndalǵan 10 mektep pen bes kolledj jataqhanasyna ornalastyryldy. Qazirgi ýaqytta munda 227 adam qaldy, olardyń kópshiligi týystaryna ketti. Qalpyna keltirý jumystaryna 1000-nan asa adam men 120-ǵa jýyq tehnıka jumyldyryldy, – dedi ákim.

Ákim temirjol qozǵalysyn qalpyna keltirý boıynsha jumystar júrgizilip jatqanyn da aıtty. Oqıǵa ornynda saperler relsterdi snarıadtardyń yqtımal bólikterinen tazartý jumystaryn júrgizip jatyr.

– Toqaevtyń tapsyrmasyna sáıkes zardap shekken barlyq adamǵa kómek kórsetiledi. Zańǵa sáıkes, qaza bolǵandardyń otbasyna memleketten kómek beriledi. Eger zardap shekkenderdiń arasynda múmkindigi shekteýli jandar bolsa jáne t.b. normaǵa sáıkes kómek kórsetiledi. Qıraǵan úıler men nysandarǵa keletin bolsaq, sarapshylar úsh eldi mekendi aralap shyqty, órtengen úıler men basqa da nysandar tirkelmegen. Tek shatyrlar, terezeler, esikter synǵan,– dedi ákim.