Jambyldaǵy jarylys: Taǵy bir adam qaza tapty

Qorǵanys mınıstrligi Jambyl oblysynda áskerı bólim qoımasyndaǵy jarylystan taǵy bir áskerı qyzmetshi kóz jumǵanyn habarlady. 

Mınıstrlik jarylystan taǵy bir áskerı qyzmetshi – órt sóndirý komandasynyń bastyǵy, kelisimshart qyzmetiniń starshınasy 1992 jylǵy Erkin Nádirbekov qaza tapqanyn málimdedi.

– Ol ınjenerlik oq-dári qoımasyndaǵy órtti sóndirý jumysyn basqarǵan. Jarylystan keıin oqıǵa ornynda qaza boldy. 27 tamyz kúni joǵalǵandar qataryna engen áskerı qyzmetshiler arasynda bolǵan, – dep málimdedi vedomstvo.

Qorǵanys mınıstrliginiń basshylyǵy marqumnyń otbasy men jaqyndaryna kóńil aıtty. Mınıstrlik onyń otbasyna qajetti kómek kórsetýge ýáde etti. 

Aldyn ala aqparat boıynsha aýrýhanaǵa 90-ǵa jýyq adam tústi, onyń 49-y – tótenshe jaǵdaı departamentiniń qyzmetkerleri. QR Bilim jáne ǵylym mınıstrligi balalardyń quqyqtaryn qorǵaý komıtetine kelip túsken aqparatqa sáıkes "Jambyl oblysynda (Baızaq aýdany) zardap shekkenderdiń arasynda balalar joq" dep málemdedi.

Áskerı bólim qoımasyndaǵy jarylysta joǵalǵan birneshe qyzmetker izdestirilip jatyr. 

Oqıǵa ornynda tótenshe jaǵdaı mınıstri bastaǵan jedel top jumys isteýde. Buǵan deıin Taraz mańyndaǵy jarylystan tórt áskerı qyzmetshiniń kóz jumǵany habarlanǵan bolatyn.