Murat Áıtenov turǵyn úıdi basqarýdyń jańa reformasyn túsindirdi

Shymkent qalasynyń ákimi Murat Áıtenov áleýmettik jelide apta saıyn ótetin tikeleı efırin qaıta jalǵastyrdy. Ádettegideı qala basshysy aldymen qalyptasqan epıdahýal jóninde qysqasha aıtyp ótip, jaǵdaıdyń kúrdeli ekendigin, bekitilgen sanıtarlyq talaptardy saqtaý jaqyndarymyzdyń amandyǵyna kepil bolatynyn aıtty.

Búgingi efır turǵyn úı qatynastary salasyndaǵy mańyzdy másele – múlik ıeleri birlestigi men jaı seriktestikter máselesine arnaldy.Búgingi efır turǵyn úı qatynastary salasyndaǵy mańyzdy másele – múlik ıeleri birlestigi men jaı seriktestikter máselesine arnaldy. «Bir úı - bir birlestik - bir shot» qaǵıdaty boıynsha iske asatyn bul reforma turǵyn úı qatynastaryn jańa deńgeıge shyǵarmaq. Kópqabatty turǵyn úıdi basqarý formasy aıqyndalyp, páter jáne turǵyn emes úı jaılary ıelerine ortaq múlikti basqarýǵa keń múmkindikter berilmek. Turǵyn úıdi basqarýdyń jańa nysanyn engizý arqyly árbir úıge óz turǵyndary ishinen ortaq uıym quryp, onyń esepshoty arqyly qarjylyq operasııalar júrgizýge múmkindik beriledi. Osy uıymdarǵa birikken turǵyndar ózara keńese otyryp, ortaq múlikti basqarýdy iske asyrady, olar boıynsha jóndeý júrgizý, jalǵa berý bastamalaryn atqarady.

Turǵyndar tarapynan túsken saýaldardyń mazmuny árkelki boldy. Onyń ishinde ekologııalyq jobalar, turǵyn úı qurylysy, kommýnaldyq salaǵa qatysty suraqtar, indetpen kúres máseleleri, balalardyń sabaqqa barý múmkindigi, taǵy basqa suraqtar bolyp, tolyqqandy jaýaptar berildi.

Efırge arqaý bolǵan taqyryp aıasynda múlik ıeleri birlestigi men jaı seriktestikterdi qurý tártibi túsindirilip, osy uıymdarǵa birigý arqyly turǵyndar óz úılerin jóndeýden ótkizýge joba-smetalyq qujat ázirleýge tapsyrys bere alatyny, jóndeý jumystaryna 0,02 paıyzben uzaqmerzimdi jáne qaıtarymdy nesıe alýǵa tapsyrys berýge múmkindigi bolatyny, ortaq múlkin jalǵa berip, odan túsken qarajatty óz úılerine jarata alatyny aıtyldy. Turǵyndar jóndeý jumystary boıynsha tapsyrys berýshi mindetin atqaryp, merdiger tarapynan atqarylǵan jumystardy tıisti akt boıynsha qabyldap alady jáne bul jumystarǵa akt boıynsha tólem júrgizetin bolady.

Aıta ketý kerek, Shymkentte jańa basqarý nysanyn qurýǵa bolatyn 2106 kópqabatty turǵyn úı bar. Búginde 94 úıde múlik ıeleri birlestigi qurylsa, jaı seriktestikter 475 úıde qurylǵan. Bul respýblıkadaǵy eń joǵary kórsetkish.

Efır barysynda qala ákimi turǵyndardan túsken 16 suraqqa jaýap berdi. Paraqshada qaldyrylǵan árbir suraqqa memlekettik qurylymdar tarapynan jazbasha túrde jaýap beriledi.