02 Tamyz, 2021 Suhbat
Qurmet Talapqazy/Foto: Facebook.com/@Gýlbaný Abenova
Mańǵystaý oblysynda, Qyzylorda oblysy Aral aýdanynda jem-shóptiń joǵynan mal qyrylyp jatqanda qınalǵan halyqqa shóp jınap jóneltip kómek qolyn sozǵan túrkistandyq erikti Qurmet Talapqazy Qamshy tilshisine qazirgi jumystary qalaı júrip jatqany týraly aıtyp berdi.
Qurmet qazir elordada júr. Ol jerge Nur-Sultan mańaıyndaǵy aýyldardyń Mańǵystaýǵa kómegin jetkizý maqsatymen kelgen.
– Qazir Nur-Sultandamyn. Erteń Petropavl men Pavlodarǵa jolǵa shyǵamyn. Osy ýaqytqa deıingi batysqa jibergen shópterimiz Mańǵystaý oblysynyń 7 aýdanyna jetti. О́zim ol jaqqa baryp, halyqqa bir ret shópti taratyp berdim. Qalǵan shópterdi sol jerdegi jaýapty adamdar halyqqa teńdeı bólip berip jatyr, – dedi túrkistandyq erikti.
Qurmet shóp jınaý týraly áleýmettik jelige úndeý joldaǵaly kásipkerler men ákim, túrli laýazymdy adamdar jıi habarlasqanyn aıtady.
– Bizge kómektesip jatqan sol halyq. Áleýmettik jelige úndeý jarııalaǵannan keıin ońtústik halqynyń kóbi maǵan habarlasyp shyqty. "Qandaı kómek kerek?"", "Ne isteımiz?" deıdi. Olarǵa ár aýyldan eń bolmaǵanda 1 túpten bolsa da jaǵdaılaryna qaraı shóp jınap berýin suradym. Qazir solardyń bári óz aýyldarynda shóp pen aqsha jınap, bizge kezek-kezek jiberip jatyr, – deıdi ol.
Qurmet ońtústik halqynan bólek Qaraǵandy, Aqmola, Almaty, Shyǵys Qazaqstan oblysynan da eriktiler shyǵyp, járdem berip jatqanyn aıta ketti. Sózinshe, shópti ózderi oryp, jınap batysqa jóneltip jatqan aımaqtar da bar.
– Batysqa jiberilgen shóptiń 40-50-in satyp aldyq. 1 vagon shópke 1 mıllıon teńgeden artyq aqsha ketedi. Batys jaqta shóp jetpegen áli óte kóptegen jer bar. Qazirgi jınap jatqan shóbimiz barlyǵan birdeı jetpeıdi. Aldymyzda kúz ben qys kele jatyr. Osy ýaqytqa deıin batysqa 170-ten astam vagon shóp jiberdik. Qazir qasymdaǵy jigitterdiń biri Oral qalasyna ketti. Al men soltústikte júrmin. Petropavl men Pavlodar qalasy mańynda bizge 2000 gektar jerdi orýǵa berip otyr. Sony oryp, jıyp alýǵa traktor qajet. Bir jaǵynan shóp satyp alamyz. Ary-beri júrisimiz bar. Osylarǵa aqsha kerek. Qazir esepshotymyzdaǵy aqshamyz bitti. О́zimiz kishkene qaryzdar bolyp qaldyq, – deıdi Qurmet Talapqazy.
Sondaı-aq ol memleket 1 aı boıy vagonmen shóp tasýdy tegin etip jasap bergeni úlken kómek bolǵanyn, biraq shóp maýsymy qyzyp turǵandyqtan, shóp oratyn tehnıka men jol máselesi qaıtadan kún tártibine shyǵatynyn jasyrmaı, úkimet jol shyǵynyn kóterip berse degen tilegin jetkizdi.
Qurmet "halyq tarapynan qarajat túse beretin bolsa, jumys jalǵasady" dep otyr.
Qate tapsańyz, qajetti bólikti tańdap ctrl+enter basyńyz.
Usynylǵandar
Pikir qaldyrý
pikir