Sáken Bıbosynov: 18 mıllıon halyq senim artyp otyrǵandyqtan bar-kúsh jigerimdi saldym

Qazaqstandyq boksshy Sáken Bıbosynov Tokıo olımpıadasyndaǵy jeńisti jolyn jalǵastyrýda, dep habarlady olympic.kz saıty. 

52 kelige deıingi salmaqta óner kórsetetin boksshy 1/8 fınalda fransýz Bılal Bennamdy 5:0 esebimen jeńgen.

 – Jekpe-jek ońaı bolǵan joq. Qarsylam óte myqty boksshy. Buǵan deıin ekeýimiz eki márte rıngte kezdeskenbiz. Esebimiz – 1:1. Keıingi jarysta men oǵan jol bergen edim. Sondyqtan osy joly ketken esemdi qaıtarýǵa shyqtym. Jeke bapkerimniń josparyn durys oryndap jeńiske jettim. Eldi ary qaraı qýantý úshin bar kúsh-jigerimizdi salamyn.

Jeke bapkerimmen qarsylasymdy jiti zerttedik. Ol jalǵyz soqqy kóp jasaıdy, sondyqtan qarymta soqqylar jasaý kerek boldy. Jaqyn qashyqtyqta turmaý, jyldam judyryqtasý degen jospar qoıyldy. Sony oryndap shyqtym. 

Olımpıadada bári bar kúsh-jigerin salyp jatyr. Sondyqtan ońaı bolyp jatqan joq. Sońǵy raýndta sharshadym, biraq artymda 18 mıllıon halyq senim artyp otyrǵandyqtan bar-kúsh jigerimdi saldym. Kelesi qarsylasym Eskobardyń jekpe-jekterin kórip júrmin. Biraq sharshy alańda kezdesken joqpyz. Jeke bapkerimmen jospar quryp, jeńiske jetip eldi qýantamyz, –  dedi boksshy.

Sáken Bıbosynov shırek fınaldaǵy qarsylasy ıspanııalyq Gabrıel Eskobar. Qos boksshy 3 tamyz kúni jartylaı fınaldyq joldamany sarapqa salady.