Ábsattar qajy Derbisáli jansaqtaý bóliminde jatqany habarlandy

Shyǵystanýshy, 2000-2013 jyldary Qazaqstan musylmandary dinı basqarmasyn basqarǵan Ábsattar qajy Derbisáli jansaqtaý bóliminde jatyr. Bul týraly Qazaqstan musylmandary dinı basqarmasynyń baspasóz hatshysy Aǵabek Qonarbaıuly habarlady.

"Múftııatty on jyldan astam basqarǵan, ǵumyryn bilim men ǵylymǵa arnaǵan Ábsattar qajy Derbisáli aýyr hálde jansaqtaý bólimine túsipti...

"Dostan – duǵa" degendeı, Alladan shıpa tilep qoısańyzdar. Alla Taǵala barsha naýqas jandardyń dertine shıpa bergeı. Synaqty sátten aman-esen ótýdi násip etkeı" delingen jazbada.

Ábsattar Baǵysbaıuly Derbisáli 1947 jyly 15 qyrkúıekte Ońtústik Qazaqstan oblysy Túlkibas aýdanynda dúnıege kelgen. 1969 jyly M.Áýezov atyndaǵy Ońtústik Qazaqstan memlekettik ýnıversıtetiniń fılologııa fakýltetin úzdik támámdaǵan. 1970-1975 jyldary KSRO Ǵylym Akademııasy Shyǵystaný ınstıtýtynyń aspırantýrasynda oqydy. Shyǵystanýshy, dintanýshy, ádebıet zertteýshi, jazýshy, synshy, fılologııa ǵylymdarynyń doktory.