"Kók tıynsyz qaldym". "Býtıa" Almatydaǵy ómiri qalaı bastalǵanyn aıtty

"Býtıa" laqap atymen tanymal belgili bıznesmen Bolat Ábilov týǵan jeri Qaraǵandydan Almatyǵa kelýine almatylyq qyzǵa úılenýi ári jańa nárseni baıqap kórýge degen talpynys sebep bolǵanyn eske alady.

– Keremet, tańǵalarlyq Aıgúlge úılengennen keıin biz Almatyda turamyz dep sheshtik. Shynymdy aıtsam, Qaraǵandy maǵan tarlyq etip, qysyp turǵandaı bolyp júretinmin. Bir jaǵynan Aıgúlge Qaraǵandyda jaqsy ómir usyna almaıtynymdy da túsindim. Ata-anamnyń batasyn aldym da jıǵan-tergenimdi Qaraǵandyda qaldyryp, kóshetin boldym. 1986 jyly 1 aqpanda Almatyǵa 25 sommen keldim. Bul – senbi bolatyn. Al dúısendi jańa qyzmetim respýblıkanyń kómir óndirisin baqylaıtyn tehnıkalyq qadaǵalaý mekemesine jumysqa shyǵýym kerek. Ertesi tanysymnyń úıine qonys toıǵa bardym. Bári "shahter, demek baı" dep oılaıdy ǵoı. Sondyqtan qaltamdaǵy 25 somdy syılyq retinde tartý etip, ózim kók tıynsyz qaldym. Osylaısha, Almatydaǵy ómirim bastaldy, – deıdi ol medıakásipker Armanjan Baıtasovqa bergen suhbatta.

Kásipker jańa qyzmeti statýsy jóninen shahtadaǵy jumystan joǵaryraq bolǵanymen aılyǵy birneshe esege az bolǵanyn, burynǵy 500-700 somnyń ornyna  180 som ǵana alǵanyn aıtady. Endigi kezekte Bolat Ábilovtyń aldynan jańa – jas januıaǵa jaıly ómirdi qalaı qamtamasyz etý kerek degen mindet shyǵady.

Oqı otyryńyz:

♦ Bolat Ábilov: 7 jyldaı jer astynda boldym

♦ "Prezıdentke kelýim kerek ekenin aıtty". "Býtıa" bastyqtarmen araqatynasy jaıly baıandady