Vaksına saldyrmaǵandar qansha aıyppul tóleıtini belgili boldy

Vaksınasııalanbaǵan qyzmetkerlerdi jumysqa kirgizgen basshylarǵa salynatyn aıyppul mólsheri anyqtaldy. Bul týraly sanıtarlyq-epıdemıologııalyq baqylaý komıtetiniń resmı ókili Erjan Baıtanaev habarlady.

Memlekettik sanıtar dárigerdiń sońǵy qaýlysy boıynsha 20 adamnan asatyn ujymdardyń barlyǵy 15 shildege deıin vaksına saldyrýǵa mindetti.

– Memlekettik sanıtar dárigerdiń talaptaryn oryndamaǵan basshylarǵa ákimshilik quqyq buzýshylyq týraly kodeksiniń 462-baby (Memlekettik ınspeksııalar men memlekettik baqylaý jáne qadaǵalaý organdarynyń laýazymdy adamdaryna ózderiniń qyzmettik mindetterin oryndaýyna kedergi keltirý, qaýlylardy, nusqamalardy jáne ózge de talaptardy oryndamaý) jáne 425-baby (Halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý) boıynsha aıyppul salynady, – dedi Erjan Baıtanaev. 

Aıyppul kólemi jeke tulǵalar úshin 5 AEK (14 585 teńge),  zańdy tulǵalarǵa 15 AEK (43 755 teńge).

Shaǵyn kásipkerlik sýbektilerge nemese kommersııalyq emes uıymdarǵa – 100 AEK (291 700 teńge), orta kásipkerlik sýbektilerine – 200 AEK (583 400 teńge), iri kásipkerlik sýbektilerine – 500 AEK (1 458 500 tenge).

Budan bólek, kásipkerlik nysan qyzmetin toqtatý túrindegi shara da qarastyrylǵan.

15 shildeden keıin monıtorıngtik toptar ishinara tekserýler júrgizedi. Buzýshylyq anyqtalǵan jaǵdaıda aıyppul sanksııalary qoldanyla bastaıdy.

Vaksınasııalanbaǵan qyzmetkerler (sońǵy úsh aı ishinde turaqty medısınalyq qarsy kórsetilimderi bar jáne Covid-19 aýyryp jazylǵan adamdardy qospaǵanda) mindetti PTR-testileýden jeti kúnde bir ret ótýi qajet.