Qazaqstandyq bank lısenzııasynan aıyryldy

"Capital Bank Kazakhstan" aksıonerlik qoǵamy, baǵaly qaǵazdar naryǵyndaǵy banktik jáne ózge de operasııalar men qyzmet júrgizýge berilgen lısenzııasynan aıyryldy. Bul týraly qarjy naryǵyn retteý jáne damytý agenttigi habarlady. 

Agenttik málimetinshe, lısenzııadan aıyrylýǵa prýdensııalyq normatıvterdi jáne basqa da mindetti normalar men lımıtterdi júıeli túrde buzýy, banktiń iri qatysýshysynyń ýákiletti organnyń qosymsha kapıtaldandyrý jónindegi talaptaryn oryndamaýy "Capital Bank Kazakhstan" bankiniń tólemge qabiletsiz bank sanatyna jatqyzylýy sebep bolǵan.

"Banktiń ótimdi aktıvteriniń mólsheri 149 mıllıon teńgeni quraıdy, oryndalmaǵan klıent tólemderiniń kólemi 15,0 mıllıard teńgeden asady.

Agenttik bankke prýdensııalyq normatıvterdi oryndamaýyna baılanysty 29 qadaǵalap den qoıý sharasyn qabyldap, 67 ákimshilik quqyq buzýshylyq týraly hattama toltyrǵan. Byltyr bank aksıoneri banktiń qarjylyq jaǵdaıyn jaqsartýǵa qatysty josparyn usyndy. Osylaısha sol jospardy oryndaý barysynda agenttiktiń qatań baqylaýymen bank 2020 jáne 2021 jyldary banktiń depozıtorlar aldyndaǵy 31 mıllıard teńge somasyndaǵy mindettemelerin tómendetti" delingen habarlamada.  

Qarjy naryǵyn retteý agenttigi bank salymshylary 99%-nyń depozıti tolyq kólemde óteletinin málim etti.