Komandalyq kóshý. Alekseı Soı óziniń taǵy bir adamyn janyna tartty

Buǵan deıin densaýlyq saqtaý mınıstri Alekseı Soımen qyzmettes bolǵan Batyrbek Ábdildın mınıstrlikke qarasty apparatqa basshy bolyp taǵaıyndaldy.

Ol 1982 jyly Qostanaı oblysynda dúnıege kelgen. A. Baıtursynov atyndaǵy Qostanaı memlekettik ýnıversıtetin, Ortalyq Azııa ýnıversıtetin, Sıngapýr ýnıversıtetin támámdaǵan.

Eńbek jolyn 2001 jyly Qazaqstandaǵy sheteldik kommersııalyq uıymnyń ókili retinde bastaǵan. 2002-2005 jyldary – QR Indýstrııa jáne saýda mınıstrliginiń "Qurylys konsaltıng" AQ mamany, memlekettik satyp alý bóliminiń basshysy; dırektorynyń orynbasary, 2005-2009 jyldary jeke uıymdarda basshylyq qyzmetter atqarǵan.

2009-2011 jyldary "Zamanaýı medısınalyq tehnologııalardy engizý ortalyǵy" RMK memlekettik satyp alý jáne materıaldyq qamtamasyz etý bóliminiń basshysy, dırektor orynbasary, 2011-2015 jyldary "Astana qalasy ákimdiginiń №1 qalalyq aýrýhanasy" MKK bas dárigeriniń orynbasary bolǵan. 2015-2020 jyldary jeke sektorda eńbek etken. 2018-2019 jyldary Qazaqstannyń medısınalyq týrızm qaýymdastyǵynyń atqarýshy dırektory, 2020 jylǵy qyrkúıekten bastap qazirgi ýaqytqa deıin – densaýlyq saqtaý mınıstrligi jobalyq keńsesiniń basshysy qyzmetin atqarǵan.

Batyrbek Ábdildın 2018-2019 jyldary Qazaqstannyń medısınalyq týrızm qaýymdastyǵynyń atqarýshy dırektory bolyp turǵanda Alekseı Soı qaýymdastyq tóraǵasy jáne quryltaıshylardyń biri bolǵan. Sondaı-aq ol bir kezderi Ulttyq shuǵyl medısınany úılestirý ortalyǵy jobasynyń jumys toby qataryna engen. Al ol kezde jobaǵa búgingi densaýlyq saqtaý vıse-mınıstri Erlan Qııasov jetekshilik etken.

Alekseı Soı eshqandaı klanǵa tıesili emestigin, qyzmetten qyzmetpe óz komandasymen kóshýden aýlaq ekenin aıtqanymen, aınalasyna óz adamdaryn shoǵyrlandyrýy jalǵastyryp keledi.

Máselen, Alekseı Soı densaýlyq saqtaý mınıstrligine prezıdent isteri basqarmasynyń medısınalyq ortalyǵynan aýysyp kelgen. Ol jaqta onyń orynbasarlary Ajar Ǵınııat, pen Erlan Qııasov bolǵan. Búginde ekeýi de vıse-mınıstr qyzmetinde. Sońǵysy Qazaqstannyń bas sanıtar dárigeri qyzmetin qosa atqarady.