"Poıyzǵa jiberilmeıdi". Temirjol vokzalyna kirgizý tártibi ózgeredi

Nur-Sultandaǵy "Nurly jol" vokzalyna 17 maýsymnan bastap tek Ashyq qosymshasy arqyly ǵana kirýge bolady. Bul týraly vedomstvoaralyq komıssııa habarlady.

Koronavırýstyń taralý qaýpin tómendetý maqsatynda vokzaldyń barlyq kireberisinde QR-kod ornatylady. Ony Ashyq, Kaspi.kz, Homebank men Aitu qosymshalary arqyly skanerden ótkizip jeke statýsty bilýge bolady.

Eger jolaýshyda qosymsha bolmasa, vokzal qyzmetkerine JSN-dy aıtý kerek. Ol Ashyq qosymshasy arqyly adamnyń statýsyn ózi kóredi. Sheteldikterdiń statýsy da tólqujattyń nómirimen tekseriledi. Al 18 jasqa tolmaǵan balalar tekseristen ótpeıdi.  

Bılet satyp alǵan jolaýshyda "qyzyl" nemese "sary" statýs shyqqan jaǵdaıda poıyzǵa jiberilmeıdi.

Qosymshada tórt statýs bar. Olar:  

jasyl  – PTR-test tapsyrǵan jáne teris nátıjesi bar adam.

kók – PTR-testi joq, vırýs juqtyrǵandarmen baılanysta bolmaǵandar.

sary – naýqaspen baılanysta bolǵan adam.

qyzyl – PTR-test oń nátıje shyqqan adam.