Aımaǵambetov mektep dırektorlaryna qatysty málimdeme jasady

​Mektep dırektorlaryn rotasııalaý bir ákimshilik-aýmaqtyq birlik sheginde júzege asyrylady. Bul týraly bilim jáne ǵylym mınıstri Ashat Aımaǵambetov aıtty. 

Mektep dırektorlaryn rotasııalaý bir ákimshilik-aýmaqtyq birlik sheginde júzege asyrylatyn bolady.

Bilim jáne ǵylym mınıstri Ashat Aımaǵambetov engizilgeli jatqan rotasııa ınstıtýtyn túsindirdi. Onyń sózinshe, rotasııa ınstıtýty – dırektorlardy taǵaıyndaýdyń jańa júıesi, olardy attestattaý, jalaqy men eńbek jaǵdaıyn arttyrýmen qatar basqarý sapasyn jaqsartýdyń tıimdi tetikteriniń biri.

– Jalpy álemdik tájirıbe kórsetip otyrǵandaı, kadrlardy jańartý, rotasııalaý óte mańyzdy. Qazir kópshilik óz pikirlerin bildirip jatyr. Olardyń arasynda "erteń búkil el boıynsha 7500 dırektor bir mezette jumys ornyn aýystyrady" dep jatqandar da bar. Negizinde, olaı emes. Máselen, Pavlodar oblysynda jumys istep júrgen adam Qaraǵandy oblysyna nemese Qaraǵandy oblysynan Túrkistan oblysyna jiberilmeıtini túsinikti. Qazir biz tek bir ákimshilik-aýmaqtyq birlik sheginde ǵana aıtyp jatyrmyz. Rotasııalaý boıynsha naqty krıterııler anyqtalady. Biz ózgelerdiń bul tetikti óz múddeleri úshin paıdalanýyna jol bermeýimiz kerek, – dedi Aımaǵambetov.

Mınıstr búginde vedomstvo ókilderi sarapshylarmen birlese dırektorlardy rotasııalaý erejelerin talqylap jatqanyn aıtty. Keıin mektep dırektorlaryn rotasııalaý boıynsha naqty krıterııler anyqtalady.

– Qazir áriptesterimizben birge dırektorlardy rotasııalaý erejelerin talqylap jatyrmyz. Biz halyqaralyq jáne álemdik tájirıbeni zerttedik. Túpkilikti sheshim barlyǵynyń pikirin eskere otyryp qabyldanady. Osyndaı jańa ınstıtýttardy engizý kezinde "zııan keltirme" qaǵıdasyn ustaný mańyzdy. Iаǵnı, barlyq táýekeldi eskerip, rotasııaǵa arnalǵan negizderdi naqty reglamentteý qajet, – dep atap ótti ol.