Foto: VVS
Batys elderi bortynda Nexta medıa-resýrsynyń burynǵy redaktory, belsendi Roman Protasevıch bolǵan ushaq baǵytyn kúshtep ózgertip, Mınskke qonýǵa májbúrleýge narazylyq bildirip jatyr.
Ryanair ushaǵy jeksenbide Eýropa odaǵy elderiniń ishki reısin oryndaý barysynda Grekııa astanasy Afınydan Latvııa astanasy Vılnıýske ushyp bara jatyp, "bortta bomba bar" degen sebeppen ıstrebıtelderdiń kómegimen kúshtep Belarýs astanasy Mınskke qondyrylǵan. Ushaq qonysymen, bomba týraly aqparat ótirik bolyp shyqqany habarlanyp, bortta bolǵan jýrnalıst Roman Protasevıch tutqyndalǵan.
Ushaqty májbúrli qondyrý týraly buıryqty Belorýs prezıdenti Aleksandr Lýkashenkoniń jeke ózi bergen.
VVS dereginshe, oqıǵa Eýropada qyzý talqyǵa sebep bolyp, memleketter Protasevıchti dereý bosatýdy talap ete bastaǵan.
Lıtva prezıdenti Gıtanas Naýseda EO-ny Belarýske jańa ekonomıkalyq sanksııalar salýǵa shaqyrǵan. Belarýs prezıdenti Lýkashenko men eldiń ondaǵan sheneýnigi qazirdiń ózinde EO sanksııasyna ilingen. Budan bólek olarǵa Eýropa elderine barýǵa shekteý qoıylyp, aktıvteri buǵattalǵan.
Eýropa komıssııasynyń basshysy Ýrsýla fon der Lıaıen "mundaı zańsyz árekettiń saldary bolatynyn" atap ótse, Polsha premer-mınıstri Mateýsh Moraveskıı muny "memlekettik terrorızmniń buryn-sońdy bolmaǵan kórinisi" dep málimdedi.
AQSh memlekettik hatshysy Entonı Blınken "esten tandyrarlyq oqıǵany" aıyptap, prezıdent Baıden ákimshiligi "áriptesterimen kelesi qadamdardy kelisetinin" málim etti.
Ulybrıtanııa, AQSh, EO-dan quralǵan Syrtqy ister boıynsha komıtettiń segiz ókili Belarýske jáne Belarýstten ushýǵa tyıym salý kerektigi týraly bastama kóterdi. Keı resmı tulǵalar Eýro Odaqqa Belorýsten keletin jeńil jáne júk kólikterin kirgizbeýdi usynyp jatyr. Olardyń sózinshe, Lýkashenko, byltyrǵy daýly saılaýdan keıin opposısııanyń únin óshirý úshin qaı jerge deıin barýǵa daıyn ekenin kórsetken. Endi EO ol qandaı qun tóleýge daıyn ekenin sheshýge tıis.
Reıs baǵyty qalaı ózgertildi?
FR4978 reısi Lıtva shekarasyna jetkenine kóp bolmaı, Mınske qaraı batysqa burylady. Bordta 171 adam bolǵan.
Ryanair málimdemesinde ekıpaj múshelerine Belarýs áýedıspetcher qyzmetinen bordtaǵy yqtımaldy qaýip týraly habarlama kelip, jaqyn mańdaǵy Mınsk áýejaıyna qoný týraly nusqaý berilgeni aıtylady.
Flightradar24 saıtynda kórsetilgen ushý traektorııasyna sáıkes, ushaq burylǵan sátte Mınskke qaraǵanda Vılnıýske jaqyn bolǵan.
Keı jolaýshylar ınsıdent bastalǵanda Protasevıchtiń mazasyzdanǵanyn kórgenin aıtqan. "Ol ózine ólim jazasy qaýpi tónip turǵanyn aıtty" degen 40 jastaǵy Monoıka Sımkıene AFP agenttigine.
Basqa jolaýshy Reuters-ke Protasevıch jaǵdaıdy bilgende noýtbýgy men telefonyn joǵarǵy shkaftan shyǵaryp, janyndaǵy serigine bergenin habarlaǵan. Alaıda Lıtva prezıdenti Protasevıchtiń serigine ushaqqa oralýǵa ruhsat etpegenin málim etti.
Protasevıch kim?
Protasevıch Nexta medıa-kompanııasynyń, Telegram kanalynyń burynǵy redaktory. Ol 2019 jyly Belarýsten ketip, 2020 jylǵy prezıdent saılaýy barysyn aqparattandyryp otyrǵan. Nexta Belarýstegi prezıdent saılaýy kezinde opposısııanyń daýys berýinde sheshýshi ról atqardy. Oppozısııa Lýkashenko daýys urlady dep sanaıdy. Úkimet jańalyqtardy taratpaı qoıǵannyn keıin bul pikirdegi adamdar kóbeı tústi. Osydan keıin oǵan terrorızm men tártipsizdikti qozdyrý boıynsha aıyp taǵylǵan.
Batys lıderleri oppozısııa basshysy kandıdat Svetlana Tıhanovskaıany qoldaǵan. Saılaýdan keıin Lýkashenkonyń jeńisine narazy ondaǵan myń adam birneshe aı boıǵy alańǵa shyqqan. Narazylyq aksııasyna shyqqandardy jergilikti polısııa uryp-soqqan, azaptaǵan áreketter kóptep bolyp, ondaı jaǵdaılardy Nexta udaıy jarııalap otyrǵan. Bıyldyń ózinde polısııa talapynan jasalǵan aıaýsyz áreketterdiń kóptegen jaǵdaılary tirkelip, 2700-den astam sottaý isteri bolǵan.
Aleksandy Lýkashenko Belarýsti 1994 jyldan beri basqaryp keledi. Ol prezıdent retinde 6 márte qaıta saılanǵan. Onyń saıasatta "Eýropanyń sońǵy dıktatory" degen aty bar.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir