Pavlodar perzenthanasy sábılerdi aýystyryp jibergen

Perzenthanada qyzymdy aýystyryp jiberdi degen, reseılik erli-zaıyptylar Pavlodar qalalyq perzenthanasyn sotqa berdi, dep habarlady IRBIS TV saıty.

Svetlana Pedchenko 1993 jyly Pavlodarda kenje qyzyn bosanady. Medbıkeler sálden soń sábıdi áıelge bergende ol nárestesiniń syrtqy kelbetinde aıyrmashylyq baryn baıqaıdy. Biraq oǵan asa mán bermeıdi. Tek 2020 jyly kezdeısoq óz qyzyn emes, kórshi palatadaǵy beıtanys áıeldiń qyzyn tárbıelegenin biledi. 

Svetlana otbasymen birge sońǵy 3 jyldan beri Reseıdiń Novosıbırsk qalasynda turyp keledi. Ol barlyq balalaryn Pavlodarda dúnıege ákelgen. Kishi qyzyn 1993 jyly №2 qalalyq perzenthanada bosanǵan. "Dárigerlerdiń qateligi boıynsha náresteler aýysyp ketti" dep topshylaıdy. 

Svetlanamen birge palatada taǵy bir áıel jatqan. Olardyń balalary 20 mınýt aıyrmashylyqpen dúnıege kelgen. Svetlana dárigerler sábılerdi jórgekke oraý kezinde nárestelerdi aýystyryp alǵan bolýy múmkin dep boljaıdy.

Ýaqyt óte kele úıdiń kenjesi ózge balalarǵa uqsamaıtynyn baıqala bastaǵan. Dese de Svetlanaǵa kenjesi "bireýdiń balasy" degen oı múldem kelmegen. 

– Ol meniń úlken ulyma uqsamady. Ulym meniń aqquba, kók kózdi. Al meniń qolymda qara tory, kózi qara qyz boldy. Kúıeýimde sheshen ultynyń qany bar bolǵandyqtan, qyzymnyń túrindegi ózgesheliktiń sebebi sol shyǵar dep oıladym. Dese de bótenniń balasy degen oı múldem bolmady, – deıdi ol. 

Svetlananyń kishi qyzy qazir 27 jasta. Ol ótken jyly áleýmettik jeliden tanys áıeldiń sýretin kórip qalady. Onyń paraqshasyna kirip qarasa, ózine qatty uqsaıtyn qyzdyń sýreti turady.

Uzamaı olar Pavlodarǵa baryp, sýrettegi otbasyny tapqan. Svetlana DNQ test jasatyp, ózi ósirgen qyz bıologııalyq turǵydan 100% týǵan qyzy emes ekeni anyqtalǵan.

– Qudaıǵa shúkir, qyz ósken, ony januıasy jaqsy kóredi. Biraq ómir qaıtarylmaıdy ǵoı. Eshteńeni ózgerte almaısyń. Meniń janym qatty aýyrdy, – degen áıel sábılerdi aýystyryp jibergen perzenthanany sotqa bergen.

– Qazir Oleg Pavlovıch Pedchenko men Svetlana Vladımırovna Pedchenkonyń talap aryzy boıynsha Pavlodar qalalyq №2 perzenthanasyna qatysty azamattyq is qozǵalýda. Sýlatnovalar úshinshi tulǵa dedi, – qalalyq sotynyń baspasóz hatshysy Rýfat Erǵalıev.

Erli-zaıyptylar perzenthanadan moraldyq shyǵyn túrinde 20 mıllıon teńge talap etýde. Ekinshi otbasy sotqa júginbegen.