Izraıl Gazaǵa joıqyn shabýyl jasap, HAMAS tobynyń jerasty jolyn joıdy

Dúısenbide Izraıl áskerıleri kezekti áýe shabýylyn bastady. Jarylystar Gaza qalasyn soltústikten ońtústikke qaraı qıratyp keledi. Bul 42 adamnyń ómirin qıǵan jeksenbidegi shabýyldan da joıqyn ekeni habarlanyp jatyr. Izraıl áskeri áýe shabýyly kezinde HAMAS tobynyń (Gaza Sektoryn baqylap otyrǵan keı memleketter lańkestik top dep tanyǵan uıym) 15 shaqyrymdyq jerasty joly men HAMAS komandırleriniń 9 úıi joıylǵanyn málim etti.

 

 

Ekinshi aptaǵa jalǵasyp jatqan Gaza Sektoryndaǵy qaqtyǵystyń alǵashqy aptasynda Sektorda 192 adam, onyń ishinde 58 bala, 34 áıel qaza tapqan.

 

HAMAS tobynyń Izraıldiń Amkelon, Beer-Sheva qalalaryn atqylaýynyń saldarynan 10 adam, onyń ishinde 2 bala qaza tapqany habarlanǵan.

 

Jeksenbide BUU Qaýipsizdik keńesi jınalyp, Sektordaǵy jaǵdaıǵa baılanysty bir mámlege kele almady. Qytaı keńestiń biraýyzdan málimdeme jasaýyna AQSh kedergi keltirdi dep otyr.

 

Aljazeera dereginshe, qaqtyǵys bastalǵaly 366 bala jaraqat alǵan.

 

Sektordaǵy qaqtyǵysqa birneshe arab otbasyn Shyǵys Ierýsalımnen basqa shaqqa kóshirý týraly sot sheshimi sebep bolǵan. Sot sheshimi keıinge qaldyrylǵanymen qaqtyǵys toqtamady.

 

Ierýsalım 1967 jylǵy Alty kúndik soǵystan keıin Izraıl baqylaýynda. Alaıda halyqaralyq qaýymdastyq qalanyń tutas Izraılge tıesili ekenin moıyndamaǵan. Qala birneshe bólikke bólingen. Qalanyń Shyǵys bóliginde arabtar turady. Izraıl bıligi Shyǵys Ierýsalımde turatyndarǵa el azamaty ataný quqyǵyn bergen. Biraq ol jerdegilerdiń basym kópshiligi rezıdent retinde turyp keledi.

 

Gaza Sektory zań júzinde táýelsizdigi ishinara moıyndalǵan Palestına memleketiniń bir bóligi bolyp sanalady. Shyǵysy men soltústigi Izraılmen shektesip jatyr. El keı memleketter lańkestik top dep tanyǵan HAMAS tobynyń baqylaýynda.

 

Palestına zań júzinde táýelsiz memleket. Biraq onyń táýelsizdigin BUU memleketteriniń barlyǵy birdeı moıyndamaǵan. Qazaqstan Palestınanyń táýelsizdigin moıyndaǵan. Elde shyn máninde egemendik naqty qurylmaǵan. Memlekettik qurylymdar ishinara ǵana jasaqtalǵan. Memlekettiń prezıdenti, úkimeti men parlamenti bolǵanymen, áskeri, ulttyq valıýtasy, halyqaralyq áýejaıy joq.