Baıbektiń talap-aryzy: Mamaı «onyń mazmunymen tanys bolmasa da» saraptama qorytyndylarymen kelispeıtinin málimdedi

Baıbektiń talap-aryzy: Mamaı «onyń mazmunymen tanys bolmasa da» saraptama qorytyndylarymen kelispeıtinin málimdedi. Bul týraly Baýyrjan Baıbektiń ókili óziniń áleýmettik jelidegi paraqshasynda jazdy.

«Qurmetti dostar!
B.Baıbektiń J.Mamaı men I.Imanbaevaǵa qatysty bergen talap aryzyna sáıkes azamattyq is boıynsha sýdıa R. Sartaeva 2021 jylǵy 11 mamyrda azamattyq is qozǵaý týraly uıǵarym shyǵardy.
Búgin onlaın-rejımde sot talqylaýyna daıyndyq bastaldy. Aıta ketý kerek, bul – azamattyq prosestiń mindetti kezeńi.

Osyǵan baılanysty kelesi jáıtterdi nazarlaryńyzǵa usynamyn.
Birinshiden, sot talap qoıýshynyń, ıaǵnı B.Baıbektiń talap qoıýy kezinde talap aryz berý nysany men mazmuny, sondaı-aq talap aryzǵa qosa berilgen qujattar boıynsha Azamattyq is júrgizý kodeksiniń 148 jáne 149-baptarynyń barlyq talaptary saqtalǵanyn anyqtady.

Iаǵnı, biz usynǵan materıaldardy sot is qozǵaý úshin jetkilikti dep tanydy. Sondyqtan da jekelegen áleýmettik jelilerdi paıdalanýshylardyń talap aryzdyń tıisti talaptarǵa sáıkes kelmeıdi degen ýájderi múldem negizsiz.

Ekinshiden, búgin sot J.Mamaı men I.Imanbaevany talapkerdiń tarapyna aıtylǵan aıyptaýlaryna jazbasha dálelder (pikir) usynýǵa mindettedi.

Bul rette, sot naqty qujattarmen rastalǵan pikir usynylmaǵan jaǵdaıda is qolda bar dáleldemeler boıynsha qaralatynyn túsindirdi.

Esterińizge sala keteıin, biz talap aryzda 20-dan astam resmı qujatqa, ákimdik qaýlylaryna, kelisimsharttarǵa jáne jaýapkerlerdiń negizsiz málimdemelerin joqqa shyǵaratyn ózge de materıaldarǵa silteme jasadyq.

Osy oraıda zańnamaǵa sáıkes dálelderdiń bolmaýy jaýapkershilikten bosatpaıtyna nazar aýdartqym keledi.

Búgin otyrys barysynda belgili bolǵandaı, jaýapkerler ózderi týdyrǵan jaǵdaıdyń aýyrtpalyǵyn alǵash ret túsinip, birneshe kún buryn ǵana advokattar jaldaǵan.

J.Mamaı men I.Imanbaevanyń advokattary talap aryzdy talqylaýǵa daıyn bolmaýyna baılanysty talap qoıýmen jáne oǵan qosa beriletin materıaldarmen tanysýǵa ýaqyt berý týraly sotqa ótinishpen júgindi.

Bul rette I.Imanbaevanyń advokaty osyǵan deıin jarııa etilgen aıyptaýlar boıynsha dáleldemeler jınaý endi ǵana bastalǵanyn habarlady. A.Túsipovanyń sotqa júgingen sózderin keltirip óteıin: «Siz bizge usynatyn merzimder jetkilikti dálelder jınaý kezinde bizdiń quqyqtarymyzǵa nuqsan keltiredi dep qorqamyn».

Osylaısha, J.Mamaı men I.Imanbaeva aldymen B.Baıbekke qatysty jalǵan aıyptaýlardan turatyn málimdemelerdi jarııa etip, olardy túrli beınematerıaldarda qaıtalap jáne birneshe ret tarata otyryp, qajetti dálelder men faktilerdi izdeýge endi ǵana kiriskeni ańǵarylady.

Úshinshiden, biz quqyǵymyzdy paıdalana otyryp, J.Mamaı men I.Imanbaeva aıyptaýlaryna táýelsiz psıhologııalyq-fılologııalyq saraptama júrgizdik, onyń nátıjelerin áleýmettik jelilerde 30 sáýirde jarııaladyq.

Al jaýapkerler otyrys barysynda «onyń mazmunymen tanys bolmasa da» saraptamanyń qorytyndylarymen kelispeıtinin málimdedi.

Tórtinshiden, sot prosesi qaralatyn tildi anyqtaýǵa jeke túsinikteme berip ótkim keledi.

J.Mamaı men I.Imanbaeva 13 sáýirde ózderiniń «jýrnalıstik zertteý» dep atalatyn materıaldaryn ORYS TILINDE, sodan keıin baryp onyń qazaq tiline aýdarmasyn jarııalaǵanyn eskere otyryp, B.Baıbek te orys tilinde 19 sáýirde jarııa túrde barlyq aıyptaýlardy joqqa shyǵardy.

Tıisinshe, talap aryz orys tilinde berildi. Sot sheshimimen isti júrgizý tili bolyp orys tili anyqtaldy.
Zańǵa sáıkes taraptar sot usynatyn aýdarmashyǵa júginýge quqyly ekenin atap ótkim keledi.

Qoryta aıtqanda, J.Mamaı men I.Imanbaeva advokattarynyń ótinishin eskere otyryp, sot 17 mamyrdy istiń materıaldarymen tanysý kúni, al 19 mamyrdy – qaıta otyrysty ótkizý kúni dep belgiledi.

Taǵy da esterińizge sala keteıin, sot – zań ústemdik quratyn, teń quqyqty eki taraptyń ashyq tartysy barysynda naqty dálelderdi keltiretin oryn ekendigin atap ótkim keledi. Kelesi otyrysta jaýapkerler qandaı-da bir dáleldemeler usynady nemese dálelderi joq ekendigin moıyndaıdy dep úmittenemin.

Sizderdi sot talqylaýy barysy týraly ári qaraı da habardar etip otyramyn», - dep jazdy zańger.