"20 shaqty adamdy óltirgim keldi". Qazandaǵy atysty uıymdastyrǵan kúdiktiniń tergeýdegi sózi

Tatarstan avtonomııalyq respýblıkasynyń astanasy Qazanda mektepke shabýyl jasap, oq atqan Ilnaz Galıavıev esimdi 19 jastaǵy azamat 20 shaqty adamdy óltirgisi kelgenin aıtty.  Bul týraly Life-shot Telegram arnasy habarlady.

Kúdiktiden jaýap alý barysynda ol oq atqandardyń bárin jaraqattap qana qoımaı, óltirgisi kelgenin moıyndaǵan. 

– Men bireýdi jaraqattap nemese qorqytýdy kózdegen joqpyn. Tek oq atqan kezde durys dáldeı almadym. Oq atqandardyń bári óldi dep oıladym. Bastapqyda mektepten 20-ǵa jýyq adamdy óltirgim keldi, – dedi Galıavıev. 

Ol oq dárileri taýsylǵan sátte quqyq qorǵaý organdaryna berilýdi uıǵarǵanyn jetkizdi. 

– Qarýdyń oqtary taýsylǵan soń, men birinshi qabatqa tústim. Sodan kireberiste turǵan qarýly adamdy kórdim. Bul quqyq qorǵaý organy qyzmetkeri ekenin túsindim. Kósheden polısııa kóligin kórgennen keıin, berilýdi uıǵardym. О́ıtkeni meni báribir ustaıtynyn túsindim. Men ekinshi qabattaǵy ájethanaǵa patrondar bar rıýkzakty qaldyrǵanmyn. Alaıda ol jerge qaıta bara almadym. 

Polısııa qyzmetkeri meni kórmeýi úshin sál alystap turdym. Keıin ózim berilip, aldyńǵy kireberistegi esikten eki qolymdy joǵary kóterip shyqtym. Keıin meni polısııa qyzmetkerleri ustap áketti, – dep pikir bildirdi kúdikti.

Ilnaz Galıavıev dál sol sátte ózine qol jumsamaq bolǵanyn da aıtty. 

– Meni polısııa kóligine otyrǵyzǵanda ózime qol jumsamaq boldym. Sol qolymdaǵy arterııa qan tamyryn tistedim. Keıin barlyq terimdi tistedim, maı men bulshyqetke jettim, biraq arterııa tamyryn taba almadym. Sodan meniń sol qolymda qan izderi qaldy, – dedi ol. 

Ýaqytsha qamaýda otyrǵan kúdikti áli de óziniń áreketin durys dep sanaıdy. 

– Men jasaǵan isime ókinbeımin, kinámdi tolyq moıyndaımyn. Alaıda adamdardy óltirý arqyly men durys áreket jasadym dep esepteımin. Osylaısha, men bárine shynymen qudaı ekenimdi dáleldep, basqalar men qalaǵan nárseni jasaýy kerek ekenin kórsettim, – dedi kúdikti.