"Saýdada sarttan ozyp ketken halyqpyz". Baqyt Bedelhan jer máselesi týraly pikir bildirdi

Aqyn Baqyt Bedelhan jýrnalıst Nartaı Aralbaıulyna bergen suhbatynda jer daýyna baılanysty pikir bildirdi.

– Biz saýdaǵa joqpyz, biraq saýdada sarttan ozyp ketken halyqpyz. Baılyq úshin týǵan jerin, elin, dosyn, týǵan baýyryn da satyp ketkender bar. Bul satqyndyq bizdiń 30 jyldaǵy jetken "jetistigimiz". Buryn ala dorba arqyly bılikke, bilimge jetetin. Qazir bilimmen bılikke, baqytqa jetýge bolatynyn sezinetin urpaq ósip keledi, – dedi B.Bedelhan.

Sonymen qatar aqyn oppozısıoner Muhtar Áblıazov týraly oıyn aıtty.

– Men ony (red. M. Áblıazov) batyr dep eseptemeımin. Aqshasy kóp adam qaı jerde turyp aıǵaı salsa da daýysy dúnıeni dúrkiretedi. Muhtar Áblıazovtyń ornyna aqshasy joq adam aıǵaılasynshy ony halyq estı me?! Aıǵaılaýdyń da maǵynasy bolady, aıdalaǵa aıǵaılaý bar, dóıdalaǵa aıǵaılaý bar. Aıdalanyń adresi bar, joq degende "aıdala" dep aıtasyń, al dóıdalanyń adresi bar ma?! Jeke bastyń 5-10 teńgesi úshin bılikti belden basa alam nemese beline salmaq salam degen saıtanı oılar ǵana. Ultty oılaıtyn adam olaı aıtpaıdy. Shette júrip qazaqtyń qamyn oılaǵandaı bolyp júrgen adamdar qazaqtyń ádebıetin, mádenıetin, tarıhyn, rýhanııatyn qurmettep, qoshemettep qurandaı qadirleı ala ma?!, – dep saýal tastady aqyn.