"Elden, halyqtan uıat emes pe?!". Májilis tóraǵasy Baǵdat Mýsınge tapsyrma berdi

Parlament májilisiniń jalpy otyrysynda Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın qazirgi tańda 1200 aýyldy mekende múldem ınternet joǵyn atap aıtty. Onyń ishinde 510-da ınternet sapasy óte tómen.

Májilis tóraǵasy Nurlan Nyǵmatýlın mınıstrden elde qashan keń jolaqty qoljetimdi ınternet bolatynyn surady.

– Qashan keń jolaqty qoljetimdi ınternet bolady? Osy suraq neden týyndady desek, jyl saıyn sizdiń aldyńyzda bolǵan mınıstrler de parlamentke kelip, 1 jylǵa nemese 2 jylǵa shegerip keldi. 2020 jyly birinshi ýáde boldy. Qazir 2021 jyl. Siz endi 2022 jyl dep jyljytyp bastadańyz. Osy ýádelerińizden qashan nátıje bolady, qashan aıaqtalady?!, – dep Nurlan Nyǵmatýlın B. Mýsınge qarata suraq qoıdy. 

Mınıstrdiń aıtýynsha, 2020 jyldyń sońyna deıin qurǵan jospardyń ishinde tehnıkalyq jaǵdaılarǵa saı 510 eldi mekende sapasy tómen ınternet berilgen. 2022 jyldyń sońyna deıin bul jerlerde ınternet sapasy joǵarylaıdy.

Májilis tóraǵasy B. Mýsınge barlyq jospardyń oryndalýyn surap, jasalǵan jumystyń nátıjesin kórsetýdi talap etti.

– Jas mınıstrsiz, qyzmetke kiriskenińizge kóp bolmady. Parlament sizdi qoldady. Osy jumystardan bir nátıje shyǵaryńyzshy. Elden, halyqtan uıat emes pe?! Burynǵy mınıstrler bes ret ýáde bergen, aıtqan merzimdi 5 ret jyljytty. Búgin 2022 jyl dep aıtyp otyrsyz. 2012 jyldan bastap eseptesek, 100 paıyz ınternetpen qamtamasyz etemiz degen. Bul kosmosqa baryp, Marsqa alyp baratyn joba emesqoı. Búginde Eýropanyń basqa aýyldaryna barsań ınternetpen tolyq qamtamasyz etilgen. Bizde eshteńe joq. О́zińiz 1200 aýyldy mekende ınternet joǵyn aıtyp otyrsyz. Sondyqtan 2022 jyly nátıje kútemiz. Bizden qandaı kómek kerek, zańnama boıynsha qoldaýǵa daıynbyz, – dedi N. Nyǵmatýlın.