Qazaqstan Reseıdiń kesirinen qyrýar qarjydan qaǵylmaq

AQSh áskerin Aýǵanstannan shyǵara bastady. Bul jerde Qazaqstannyń AQSh áskerı tehnıkalarynyń tranzıti arqyly biraz paıda tabý múmkindigi bar edi, alaıda EAEO (RF dep túsinińiz – avtor) kesirinen Qazaqstan osy paıdadan qaǵylǵaly otyr.

Qazaqstan Kaspıı teńizi arqyly, Baký – Túrkııa baǵytyna tranzıt jasaý múmkindiginen aıyryldy, óıtkeni Reseı "AQSh Aqtaýda áskerı baza salǵaly jatyr eken", "Kaspııge jolatpaımyz" dep baıbalam salyp bul joldy japtyrdy. Oǵan Qazaqstan BAQ-tary da qosyldy. Shyndyǵynda eshqandaı da áskerı baza týraly áńgime joq, bári qarapaıym ǵana qyzǵanyshtan týyndaǵan nárse. Mine, jegeli otyrǵan nanymyzdan kózapara aıyryp qalý degen osy bolady.

Endi Aýǵanstannan shyqqan AQSh áskerıleri О́zbekstan men Tájikstanda ornalasýy múmkin. Jalpy AQSh Aýǵanstannan áskerin shyǵarǵanymen de ony alysqa alyp ketpeıdi, olardy Aýǵanstanǵa jaqyn mańda ornalastyryp, jaǵdaıdy óz betine jibermeı, baqylap otyrady. Burynǵysha aýǵan úkimetine kómektese beretin bolady.

Dese de bul jaǵdaıdyń osy aýmaq pen Qazaqstan úshin birneshe jaǵymdy jaǵy bar.

Birinshiden, tálipter oılaryna kelgenin jasaı almaıdy – AQSh áskerıleri aımaq qaýipsizdigin qamtamasyz etedi.

Ekinshiden, Reseı oılaryna kelgenin jasaı almaıdy, olar búgin Tájikstan men Qyrǵyzstandy arazdastyryp qoıǵan bolsa, kelesi kezekte taǵy bireýlerdi bir-birine aıdap salýy múmkin. Endi onyń joly kesildi.

Jalpy Tramp kezinde burynǵy TMD aýmaǵy Reseı múddesi aýmaǵy dep eseptelip keldi. Arnaıy qujat bolmasa da is júzinde solaı boldy. Endi ondaı bolmaıdy! Qazir geosaıası jaǵdaı ózgergen. RF-ǵa sanasýǵa týra keledi. Sanaspasa, óz obaly ózine. Bul tipti Qazaqstanǵa Qytaıdan da orynsyz qorqa berýge bolmaıtynyna stımýl bolýy múmkin.

Tek bul О́zbekstannyń halyqaralyq saıası arenadaǵy salmaǵyn arttyra túsedi. Árıne, buǵan óz basshylarymyzdy kinálamasaq, basqa kimnen kóremiz?

Qýanysh Edilhantegi

Sholýshy