BQO-da "Jas depýtattar korpýsy" quryldy

О́tken apta sońynda «Nur Otan» partııasynyń 2021-2025 jyldarǵa arnalǵan Jol kartasynyń negizgi baǵyttaryn júzege asyrý boıynsha QR parlamenti  májilisiniń depýtaty Elnur  Beısenbaev jumys saparymen Batys Qazaqstan oblysynda boldy. Ol oblys ortalyǵy Oral qalasyndaǵy birqatar áleýmettik  óndiris nysandarynyń jumysymen tanysyp, jańadan qurylǵan jas depýtattar korpýsynyń múshelerimen kezdesti.  

Májilismenniń sapary byltyr ashylǵan «Otbasy» ortalyǵynan bastaldy. Bul jerde mekemeniń ishki tirshilik-tynysymen tereń tanysyp,  kóp balaly analarmen tildesti. Oraldaǵy bul «Otbasy» ortalyǵy óz jumysyn bastaǵaly qamqorlyqqa zárý myńnan astam janǵa kómek qolyn sozǵan. Munda negizinen psıholog, zańger jáne áleýmettik suraqtar boıynsha baǵyt-baǵdar beretin mamandar toptastyrylypty. Sonymen birge názik jandarǵa arnalǵan sheberlik synyptary uıymdastyrylýda.

Kelesi kezekte májilis depýtaty aıaldaǵan jer – «Shabyt» shyǵarmashylyq ortalyǵy boldy. Elimizdegi epıdahýalǵa baılanysty qaladaǵy biraz meıramhana-toıhanalar óz qyzmet baǵytyn ózgertip, záýlim saraılaryn ıgilikti iske paıdalanýǵa bergeni kópke málim. Qazirgi kúni júzdegen ul-qyzdyń sabaqtan tys kezde súıikti isimen aınalysyp, óz sheberlikterin shyńdaýyna jol ashqan bul ortalyq ta kúni keshegi toıhana edi. Atalǵan mekemege oblystyq máslıhattyń jas depýtaty Shattyq О́tebalıeva jetekshilik etýde. Munda ondaǵan úıirme turaqty jumys isteıdi.

Sodan keıin  Elnur Beısenbaev «Green service company» JShS iske qosqan turmystyq qatty qaldyqtardy suryptaý jáne qaıta óńdeý zaýytynyń jumysymen tanysty.

Atalǵan kásiporynnyń quryltaıshysy, oblystyq máslıhattyń jas depýtaty Azamat Bısenovtiń aıtýynsha, bul orynǵa qaladan táýligine 200 tonna qaldyqtar ákelinedi eken.

– Kásiporynda jınalyp qalǵan qaǵaz qaldyqtaryn kádege jaratý tóńireginde de túıtkil kóp. Suryptalyp úlgergen turmystyq qaldyqtardy Reseıge shyǵarýǵa qoıylǵan marotorıı alynǵanymen, memlekettik kiris qurylymdarynan qujat rásimdep, ruqsat alý ońaı sharýa emes. Elimizdegi óńdeý zaýyttaryna jetkizýdiń shyǵyny shash etekten. Kórshiles ornalasqan Reseıdiń oblystaryna eksporttaý óte yńǵaıly, ári kóp shyǵyndy talap etpeıdi. Osy máseleni de májiliste kóterseńizder eken, – deıdi  Azamat Ǵımranuly.

Parlament májilisiniń depýtaty sonymen qatar «Bastaý» kovorkıng ortalyǵynda bolyp, óńirdiń jas depýtattarymen kezdesti.

Kezdesý barysynda Elnur Beısenbaevqa QR Táýelsizdiginiń 30 jyldyǵyna oraı Batys Qazaqstan oblysy aýmaǵynda júzege asyrylatyn jas depýtattardyń «Serpilis» jobasy tanystyryldy. Joba aıasynda ártúrli deńgeıdegi jergilikti máslıhat depýtattary óz aımaqtarynda áleýmettik mańyzy bar jobalardy júzege asyrady. Mysaly, turǵyndarǵa arnalǵan ártúrli oqytý kýrstaryn uıymdastyrý, aımaqta tazalyq jumystaryn ótkizý, volonterlik qyzmetterdi júzege asyrý jáne taǵy basqalar. Sonymen qatar, muqtaj jandarǵa kómek kórsetý boıynsha jumystardy júzege asyrady. Joba negizinen, «Balyq berme, qarmaq ber» degen prınsippen jumys jasaıdy. Iаǵnı, turǵyndardyń óz múmkinshilikterin paıdalana otyryp, olarǵa naqty qoldaýlar kórsetý.

– Elimizdiń tuńǵysh prezıdenti, Elbasy Nursultan Ábishuly Nazarbaevtyń tapsyrmasymen jas depýtattar korpýsy quryldy. Onyń quramyna májilistegi jáne jergilikti máslıhattardaǵy 600-deı jas depýtat endi. Kúni keshegi ótken saılaýdaǵy «Nur Otan» partııasy usynǵan baǵdarlamalardy júzege asyrý jolynda belsendilik tanytýymyz qajet. Aıta ketý kerek, jas depýtattar korpýsy óńirler boıynsha eń alǵashqy bolyp Batys Qazaqstan oblysynda óz jumysyn bastady. Bul jergilikti atqarýshy organdar tarapynan kórsetilgen naqty qoldaý dep bilemiz. Alda turǵan mindetterdi birlik tanytyp, birge atqarsaq ǵana eńseremiz, – dedi E.Beısenbaev.

Oblys aýmaǵyndaǵy jergilikti máslıhattardaǵy jas depýtattardyń sany 52-ni quraıdy. Respýblıka kóleminde ashylǵan Jas depýtattar korpýsynyń Batys Qazaqstan oblysy boıynsha jetekshisi bolyp qalalyq máslıhat depýtaty, jas kásipker Merjan Ábilqas saılandy.

Halyq qalaýlysymen bolǵan basqosýda oblystyq, qalalyq jáne aýdandyq máslıhattardyń jas depýtattary óz oılarymen bólisip, usynys-pikirlerin jetkizdi.