Baqytjan Saǵyntaev telearnanyń tikeleı efırinde almatylyqtardy vaksınasııaǵa shaqyrdy

Megapolıs ákimi Baqytjan Saǵyntaev «Almaty» telearnasyndaǵy Akimat Live baǵdarlamasynyń tikeleı efırinde qala turǵyndaryn, ásirese aǵa býyndy COVID-19-qa qarsy vaksına alýǵa shaqyrdy.

Baqytjan Saǵyntaev Almaty qalasy koronavırýs boıynsha «qyzyl» aımaqta ekendigin eske saldy.

«20 sáýirde táýlik ishinde koronavırýs ınfeksııasynyń 667 jaǵdaıy tirkeldi, onyń 574-i sımptomdy jáne 93-i sımptomsyz. Búginde qýattylyǵy 6060 tósek-oryndy quraıtyn ınfeksııalyq stasıonarlarda 3754 naýqas, onyń ishinde 96 bala bar. Onyń ústine, 920 adamnyń jaǵdaıy aýyr, 2834-i – ortasha aýyrlyqta. Reanımasııa men qarqyndy terapııa bólimderinde 241 adam emdelýde, ókpeni jasandy jeldetý apparatynda – 23,ınvazındi emes О́JJ apparatynda - 94, High flow apparatynda 85 naýqas bar», - deıdi ákim.

Medısına-sanıtarııalyq alǵashqy kómek mobıldi brıgadalary men telemedısına ortalyǵynyń ambýlatorııalyq baqylaýynda 6 021 pasıent bar. Onyń ishinde 5301 adamda indet belgileri bar, olar ortasha aýyr jaǵdaıda. 720 adamda aýrý belgileri joq.

Sońǵy 7 kún ishinde koronavırýstyń taralý deńgeıi 240,8-den 243,9-ǵa deıin ósti, reprodýktıvti R sany 1,023-ten 1,031-ge deıin ulǵaıdy.

«Sáýir aıynda aýrýdyń boljamdy ósýi jalǵasýda, KVI epıdemııasynyń damý dınamıkasy 3 aptanyń pessımıstik boljamyna sáıkes keledi. 1 sáýirden 20 sáýir aralyǵynda 13 002 KVI jaǵdaıy tirkeldi. Bir jasqa deıingi balalar arasynda indettiń órshýi jalǵasýda 0,5% - 1,3-ten 1,8% -ǵa deıin; 14 jasqa deıingi balalarda - 1% - 9,1-den 10,1% -ǵa deıin; jasóspirimder arasynda - 0,3% - 3,0-den 3,3% -ǵa deıin jáne 60 jastan asqan azamattar arasynda 0,6% - 23,7%-dan 24,3%-ǵa deıin»,- dedi Baqytjan Saǵyntaev.

Sonymen qatar, ol densaýlyq saqtaý júıesin modernızasııalaý men nyǵaıtý boıynsha qabyldanǵan sharalardyń arqasynda medısınalyq mekemelerdiń úlken júktemelerge oıdaǵydaı tótep bergenderin atap ótti. Alaıda, mamandardyń málimeti boıynsha pandemııanyń sharyqtaý shegi áli ótken joq.

«Sondyqtan qala turǵyndary úlken saqtyq tanytyp, sanıtarlyq-epıdemıologııalyq qaýipsizdik sharalaryn saqtaýlary tıis. Demek, KVI-den saqtanýdyń bir ǵana jol bar, ol – erikti vaksınalaný. Osy rette Almatyda barlyq jaǵdaılar jasalǵan, vaksınalar partııalary qalaǵa turaqty jetkizilýde, barlyq aýdandarda vaksınalaý pýnktteri ashylǵan»,-dedi qala basshysy.

Almatyda halyqty jappaı vaksınalaý 2 sáýirde bastaldy. 21 sáýirdegi jaǵdaı boıynsha barlyǵy 149 699 qala turǵynyna ekpe salyndy, onyń ishinde qalada jumys isteıtin Almaty oblysynyń turǵyndary da bar. 23 sáýirde vaksınanyń 35 myń dozasy, 25 sáýirde 100 myń dozadan astam vaksına jetkiziledi dep kútilýde.