Almatyda jastardy qoldaý baǵytynda qandaı sharalar atqarylýda

Almaty ákimi Baqytjan Saǵyntaevtyń tóraǵalyǵymen ótken apparattyq keńeste jastar saıasatyn iske asyrý, onyń ishinde jumyspen qamtý, turǵyn úımen qamtamasyz etý jáne kámeletke tolmaǵandar arasynda qylmystyń aldyn alý máseleleri qaraldy.

Byltyr «Eńbek» memlekettik baǵdarlamasy boıynsha 25 313 jas jumysqa ornalasty. Onyń ishinde turaqty jumys oryndaryna – 10 740, qoǵamdyq jumystarǵa – 7 142, «Jastar tájirıbesi» baǵdarlamasy boıynsha – 1 503, áleýmettik jumys oryndaryna – 361, «Jumyspen qamtýdyń jol kartasy» boıynsha – 4 027 jas jumyspen qamtyldy. «Bastaý bıznes» jobasy boıynsha 858 jas kásipkerlik negizderin oqydy, 448 jasqa granttar berildi, 234 jas qysqa merzimdi kýrstarda bilimderin jetildirdi.

«Self-Made» áleýmettik joba aıasynda 50 ulttyq jáne jeke kompanııalarmen, sondaı-aq memlekettik organdarmen taǵylymdamadan ótý týraly memorandýmdarǵa qol qoıyldy. Kolledjderdiń 150 úzdik túlegi tájirıbeden ótti. Budan ózge, kásiptik-tehıkalyq bilim beretin 43 mekemeniń 5 myńǵa jýyq stýdenti qalanyń 351 kásipornynda 38 mamandyq boıynsha dýaldy oqýmen qamtyldy. Kolledjderdiń materıaldyq-tehnıkalyq jabdyqtalýyn nyǵaıtý jáne jańartý boıynsha jumystar jalǵasýda.

О́tken jyldan bastap jastardy qoldaý sharalary týraly qoljetimdi aqparatpen keńirek qamtý maqsatynda barlyq aýdandarda «Almaty jastary» jastar resýrstyq ortalyqtary jumys isteýde. Olarda HQKO qaǵıdaty boıynsha jumyspen qamtý, turǵyn úı alý, kásipkerlikti damytý máseleleri boıynsha tegin keńester beriledi. Munda «Atameken» UKP-nyń, Halyqty jumyspen qamtý ortalyǵynyń jáne «Otbasy bankiniń» qyzmetkerleri túrli konsýltasııalar beredi. Resýrstyq ortalyqtarǵa júgingen 300-den astam jas «Eńbek» memlekettik baǵdarlamasy boıynsha jumysqa ornalasty. 8 myńǵa jýyq adam keńes aldy.

Osyǵan oraı, Almaty ákimi Baqytjan Saǵyntaev jastardy qoldaý máselelerine, ásirese olardy jumysqa ornalastyrýǵa erekshe nazar aýdarýdy tapsyrdy. Bul damýdyń jol kartasyn iske asyrýǵa jáne qala jastaryn qoldaýǵa qatysatyn barlyq aýdandar ákimderiniń jáne basqarmalar basshylarynyń basty mindetteriniń biri.

Keńes barysynda jastardyń demalysyn durys uıymdastyrý, qosymsha bilim berý, turǵyn úımen qamtamasyz etý máseleleri qaraldy. Máselen, «Nurly jer» turǵyn úı baǵdarlamasy aıasynda jastardyń jáne jas otbasylardyń qoljetimdi baspana máselesin sheshý úshin qalada jumys isteıtin jastarǵa satyp alý quqyǵynsyz 5 jyl merzimge jalǵa beriletin turǵyn úı berýdi jalǵasýda. 2019-2020 jyldary osy baǵdarlama boıynsha 1400 páter bólindi. Bıyl taǵy 1050 páter úlestirý josparda. Budan bólek, «Almaty jastary 3.0» qalalyq baǵdarlamasy boıynsha 1 myń jas baspanaly boldy.

Kámeletke tolmaǵandar arasyndaǵy qylmysty eskertý erekshe nazarda, atap aıtqanda, nashaqorlyqtyń aldyn alý máseleleri. Sońǵy 3 aıda polısııa departamenti osy salada 258 quqyq buzýshylyqtyń jolyn kesti.

Megapolıs ákiminiń tapsyrmasyna sáıkes, Polısııa departamenti bilim berý jáne Qoǵamdyq densaýlyq basqarmalarymen birlesip, kámeletke tolmaǵandar arasyndaǵy quqyq buzýshylyqty anyqtaý jáne onyń jolyn kesý boıynsha jumys turaqty júrgizýleri tıis.

Keńesti qorytyndylaǵan Baqytjan Saǵyntaev aýdan ákimderi men basqarma basshylaryna jastar ótinishteriniń sheshilýin únemi baqylaýda ustaýdy tapsyrdy. Bul jumystyń tıimdiligin arttyrý úshin Almaty ákiminiń orynbasary Erjan Babaqumarovtyń basshylyǵymen úılestirý toby quryldy. Sonymen qatar, 2025 jylǵa deıingi damýdyń jol kartasy men jastarǵa qoldaý kórsetý ózektendiriletin bolady.