«Nur Otan» partııasynda esep berý-saılaý naýqany júrip jatyr. Birinshi kezeń aıasynda 4517 bastaýysh partııa uıymynyń basshylary saılanyp, olarǵa 566 myńnan astam adam nemese jalpy partııa músheleriniń 72%-y daýys berdi.

Partııa baspasóz qyzmeti taratqan aqparatqa súıensek, esep berý-saılaý naýqany Elbasy, Partııa Lıderi Nursultan Nazarbaevtyń saılaýdan keıingi kezeńde jergilikti jerlerdegi jumysty jandandyrýǵa jáne partııanyń saılanbaly organdarynyń kadrlyq quramyn jańartýǵa qatysty qoıǵan mindetterine sáıkes júrgizilýde.

Máselen, «Nur Otan» bastaýysh partııa uıymdarynyń jańadan saılanǵan tóraǵalarynyń 39,4%-y – áıelder, 20%-y – 35 jasqa deıingi jastar.

Áıelderdiń ókildigi 4,4%-ǵa artsa, jastar sany 1,5 esege ósip otyr. Árbir besinshi BPU-nyń tóraǵasy praımerız qatysýshysy bolyp tabylady. Olardyń qatarynda bilim berý jáne densaýlyq saqtaý salasynyń qyzmetkerleri, úkimettik emes sektordyń ókilderi, qoǵam belsendileri jáne t. b. bar.

Esep berý-saılaý naýqanynyń kelesi kezeńi aýmaqtyq jáne óńirlik fılıaldardyń konferensııalary bolady. Onda partııanyń Saıası keńesteri men Baqylaý-tekserý komıssııalarynyń quramy jańartylady.

Aıta ketý kerek, buǵan deıin elimiz boıynsha «Nur Otan»-nyń óńirlik Saıası keńesteri bıýrosynyń otyrystary ótip, onda ár óńirde, qalada jáne aýdanda saılaýaldy ýádelerdiń iske asyrylýyn baqylaý boıynsha 1738 jańa qoǵamdyq keńes quryldy.
Olardyń quramyna 12 myńnan asa belsendi, onyń ishinde máslıhat depýtattary, partııalyq kadrlyq rezerv ókilderi, óńirde bedeldi jáne jergilikti jerlerdiń túıindi máselelerin jaqsy biletin azamattar, qoǵam belsendileri, sarapshylar jáne t. b. kirdi.

Partııa jańa keńesterdiń jumysy qoǵamdyq pikirdi eskerip, sondaı-aq partııanyń qoǵamdyq qabyldaý bólmelerine el kóleminde azamattardan túsken ótinishterge jasalǵan taldaýǵa negizdele otyryp, jarııa túrde júrgiziletinine ýáde berip otyr.

"Qamshy" silteıdi
Ilmek sózder: Nur Otan

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir