Onlaın nesıe rásimdeıtin alaıaqtardyń jolyn kesý boıynsha usynystar jasaldy

Ishki ister organdarynyń resmı aqparaty boıynsha, 2019 jyly ınternet alaıaqtyqpen baılanysty 7 732 qylmys tirkelse, 2020 jyly mundaı faktilerdiń sany eki esege artyp 14 110 qylmysty qurady. Mundaı derekti parlament májilisindegi "Nur Otan" fraksııasynyń músheleri Qarjy naryǵyn retteý jáne damytý agenttiginiń tóraıymy Madına Abylqasymovaǵa joldaǵan depýtattyq saýalda málim etti. 

Depýtattar E. Beısenbaev, Iý. Kýchınskaıa, M. Ahmetov sońǵy jyldary elde shaǵyn nesıe berýmen baılanysty alaıaqtyq jaǵdaılar, azamattardyń qatysýynsyz onlaın nesıeler rásimdeý derekteri jıilep ketkenin jazady.

– Alaıaqtar azamattardyń jeke derekterin paıdalana otyryp, onlaın nesıeni ózge adamǵa zańsyz rásimdeıdi. Eń soraqysy zardap shekkender olarǵa rásimdelgen nesıe týraly belgili bir ýaqyttan keıin ǵana, ıaǵnı kollektorlyq agenttikter mazalaı bastaǵan kezde nesıelik qaryzynyń bar ekenin biledi. Ishki ister organdarynyń resmı aqparaty boıynsha, 2019 jyly ınternet alaıaqtyqpen baılanysty 7 732 qylmys tirkelse, al 2020 jyly mundaı faktilerdiń sany eki esege artyp 14 110 qylmysty qurady. 2020 jyldyń qorytyndysy boıynsha mıkrokredıttik uıymdardyń ınternet-saıttary arqyly onlaın nesıelerdi resimdeý boıynsha 3 myń quqyq buzýshylyq jasalǵan. Sondaı-aq, ınternet arqyly kez-kelgen azamattyń jeke kabınetine qosylý arqyly, olardyń plastıkalyq kartalaryndaǵy shottarynan aqsha urlaý boıynsha 2,2 myńnan astam alaıaqtyq qylmys tirkelgen, – deıdi depýtattar.

Olar máseleniń kúrdeli ekenine dáleldeme retinde, keshe ǵana Soltústik Qazaqstan oblysynda er adam alaıaqtyq jolmen ózge azamattarǵa 50 nesıe rásimdegenin, atalǵan er adam alaıaqtyǵyn iske asyrý úshin ózge azamattardyń joǵalǵan jeke kýálikterin paıdalanǵanyn keltiredi. 

– Joǵarydaǵy kórsetilgen naqty mysal, mıkroqarjylyq uıymdardyń onlaın qaryzdardy berýdegi jeke tulǵany sáıkestendirý rásimderin retteý júıeleriniń tolyq pysyqtalmaǵanyn kórsetip tur. Osyǵan baılanysty, japa shekken azamattar óziniń kinásiz ekenin moıyndatyp, zańsyz nesıeni óshirý úshin 9 aıǵa deıin sottasýǵa májbúr. Bul óz kezeginde jábirlenýshiniń nesıelik tarıhyna zııan keltirip, qolma-qol aqshasyz tólem jasaýyna kedergisin tıgizedi, – delingen depýtattyq saýalda.

Depýtattar osy aıtylǵandardy basshylyqqa lyp, agenttikke klıenttiń bıometrııalyq erekshelikterin sáıkestendirý prosedýralaryn kúsheıtýdi qarastyrý qajettigin, naqty ýaqyt rejıminde keskindi tekserý jáne rastaý, ıaǵnı alaıaqtardyń buryn daıyndalǵan beıne nemese foto materıaldardy qoldanýy múmkindigine jol bermeý kerektigin kóterdi. Aqparattyq-baǵdarlamalyq júıelerdi paıdalaný arqyly onlaın-kredıtterdi resimdeý kezinde eki satyly aýtentıfıkasııany engizýdi kózdeýdiń mańyzdy ekenine nazar aýdardy.