N.Nyǵmatýlın: Qoǵamdyq baqylaý memlekettik organdarǵa qaraǵanda tıimdirek jumys isteıdi

Májilis tóraǵasy Nurlan Nyǵmatýlın áleýmettik kásipkerlik máselesi zań deńgeıinde rettelip, onyń mártebesi naqty aıqyndalýy tıis ekenine nazar aýdardy.

Búgingi jalpy otyrysta depýtattardyń bastamasymen ázirlengen áleýmettik kásipkerlikti damytý máseleler týraly zań jobasy I oqylymda maquldandy.  

Qujatqa sáıkes, sýbektini áleýmettik kásipkerler tizilimine engizý týraly sheshimdi óńirlik komıssııa qabyldaıtyn bolady. Onyń quramyna kimder kiretinin jáne onyń jumysynyń ashyqtyǵyn qamtamasyz etý qalaı josparlanyp otyrǵanyn depýtattar nazarǵa aldy. Osy rette, májilis tóraǵasy:

«Qandaı komıssııa, qandaı kásipker bolsa da  ol jergilikti halyqtan artyq bilmeıdi.  Sondyqtan, bul komıssııaǵa qoǵamdyq ókilderdiń kirgeni durys» – dep, sonda ǵana baqylaý ashyq bolatynyn jáne bul óte qajetti norma ekenin aıtty.

Palata spıkeriniń aıtýynsha, zań jobasy «áleýmettik kásipkerlik» uǵymyn, bıznes sýbektilerin kásipkerliktiń osy túrine jatqyzý sanattaryn anyqtap, áleýmettik kásipker kómektesetin nemese onyń kásipornynyń shtatynda bolýy tıis halyqtyń áleýmettik osal toptarynyń tizbesin naqtylaıdy.

Nurlan Nyǵmatýlınniń pikirinshe, osynyń bári bıznestiń áleýmettik mańyzdy baǵytyn damytýǵa maqsatty memlekettik qoldaý kórsetýge múmkindik beredi.

Jalpy otyrys barysynda májilis tóraǵasy óńirlik komıssııa tizilimge engizý úshin áleýmettik kásipkerlerdiń ótinimderin jınaıtynyn atap ótip, osy tizilimde turǵan kásipkerlerdiń qosymsha eki túri boıynsha salyq jeńildikteri bolatynyna (bul múlik salyǵyn tómendetý, sondaı-aq salyq salynatyn kiristi azaıtý) toqtaldy.

Jalpy zań jobasynda áleýmettik kásipkerliktiń uǵymdary men negizgi mindetterin bekitý, qandaı da bir uıymdy áleýmettik kásipkerlik sýbektilerine jáne áleýmettik kásipkerlik sýbektileriniń qyzmeti baǵyttalǵan halyq sanattaryna jatqyzý ólshemsharttaryn aıqyndaý kózdeledi.