Qazaqstanda ǵalymdardyń jalaqysy ortasha jalaqydan bir jarym ese az

Elimizde zań shyǵarý qyzmeti sapasy deńgeıiniń tómendeýinen bólek, erekshe qaýipti máselelerdiń biri – ǵylymı mektep sabaqtastyǵynyń qalyptastyrylmaýy. Bul týraly Akademııalyq adaldyq lıgasy jalpy jınalysynyń múshesi Talǵat Nárikbaev "О́zbekstanda zań ǵylymyn damytýdyń jáne zań shyǵarý qyzmetin jetildirýdiń ózekti máseleleri" atty  ǵylymı-praktıkalyq konferensııada málimdedi.

Halyqaralyq konferensııa barysynda basqarma tóraǵasy akademııalyq mansaptyń tartymdylyǵyn joǵarylatýǵa qatysty pikirimen bólisti.

– Qazaqstanda ǵalymdardyń ortasha jalaqysy 129 myń teńgeni (300 AQSh dollary) quraıdy, ıaǵnı eldegi ortasha jalaqydan bir jarym ese az. Ýnıversıtettegi jas zańger-oqytýshynyń jalaqysy korporatıvtik sektordaǵy biliktiligi ózimen teń mamanǵa qaraǵanda 5 ese az, – dedi Talǵat Nárikbaev.

Spıkerdiń aıtýynsha, bul túlekterdiń ýnıversıtetten jappaı ketýine jáne konsaltıngtik nemese halyqaralyq zańgerlik fırmalardan jumys izdeýine ákelip soqtyrady.

– Búgingi tańda Qazaqstandaǵy belgili zańger ǵalymdardyń ortasha jasy – 65 jas. Iаǵnı, bilikti ǵylymı kadrlar qartaıyp jatyr. Sáıkesinshe, daryndy stýdentterdi daıyndaıtyn eshkim joq. Bul vakýým óte qaýipti qubylys. Sondyqtan tıisti sharalardy qazirden bastap qabyldaýymyz kerek, – dedi ol.

Konferensııa barysynda spıker joǵaryda atalǵan máseleni sheshý úshin joǵary oqý oryndarynda laıyqty jalaqyny qamtamasyz etý arqyly jas mamandardy ǵylymı ortaǵa belsendi túrde tartý qajet ekenin basa aıtty.