Adamdardy statýsqa bólip qaraısyz ba? Ispanııadaǵy dámhana ıesiniń áńgimesi

Ispanııada iri restoran júıesin quryp, tabysty bolǵan Don Montero degen kásipker ómiriniń sońynda qoǵamǵa jáne muqtaj adamdarǵa kómek berip ketýdi oılaıdy. Ol panasyz adamdar sııaqty kıinip, ózi qurǵan dámhanalardyń birine barady.

Degenmen dámhanadaǵy qyzmetkerlerdiń áreketin Montero múlde kútpegen edi.

Menedjer "bomj" sııaqty kıingen Monteroǵa dámhanadan jyldam shyǵyp ketýin buıyrdy. Al ol qarny ash ekenin, kóp ýaqyttan beri tamaq jemegenin aıtyp, ótindi. Menedjer oǵan "aldymen jýynyp kel, kıimińdi aýystyr, sosyn kelip basqalardyń tamaq jegenine qarasań bolady. Bul elıtalyq restoran, sen sııaqty adamdarǵa kirýge ruqsat berilmeıdi" deıdi.

Montero shoshyp qaldy. Ol bul dámhanalardy barlyq qoǵamdyq statýstaǵy adamdar úshin ashamyn dep oılaǵan armanyn esine aldy. Sóıtti de, basqa qyzmetkerler kelip, meniń jaǵyma shyǵar dep oılady. Biraq kerisinshe boldy. Dámhananyń aspazy kelip "Eger qarnyń ashsa, dámhananyń artqy jaǵyna bar, sonda men keshegiden qalǵan tamaqtardy qoqysqa tastaımyn. Sol jerden qarnyńdy toıdyr. Ol sen ómirińde jeıtin eń jaqsy tamaq bolýy múmkin" deıdi. Dámhananyń kúzetshisi ony ıterip shyǵaryp jiberdi. Monteroǵa bulaı bolady degen oı úsh uıyqtasa da túsine kirmegen edi.

Sosyn ol taǵy bir dámhanasyna bardy.  Ondaǵy menedjer de dámhananyń elıtaǵa arnalǵan dámhana ekenin aıtyp, kirgizbedi. Montero óziniń bul bıznesiniń qaı jerinde qate ketkenin oılap basyn qatyrdy. Menedjment jaǵy, servıs, qyzmet kórsetý jaǵyn óz oıymen saralady. Nege qyzmetkerler osynshama dóreki, qurmetsiz bolyp ketkenin kóp oılady.

Sosyn ol eń alǵash ashylǵan ortalyq dámhanadaǵy senimdi serigi Tomasqa baryp kórmek boldy. Tomas alǵashqy dámhana ashylǵannan bergi negizgi kómekshisi edi. Ol ortalyq dámhanaǵa kirip, Tomasty kórdi de, qasyna baryp, "Meniń qarnym ashyp tur, azyraq tamaq beresiz be?" dedi. Tomas úısiz adamdar sııaqty kıingen Monterony tanymady. "Bul dámhana saǵan arnalmaǵan, qaltaly adamdarǵa arnalǵan. Basqa jaqtan tamaǵyńdy toıdyr" dedi. Montero "Men de buryn baı boldym. Bıznesim bankrot bolyp, qazir osyndaı kúıge tústim. Osy dámhanany qurǵan adam qaıyrymdy dep estidim. Qarnym toıatyndaı bir tamaq berińizshi, ótinemin" dedi.

Úısiz, tamaq taýyp jeı almaı júrgen bireýdiń ózine aqyl aıtyp, sóılep turǵanyn kórip, mazaqtap kúlgen Tomas "Bul dámhanaǵa tek tabysty adamdar ǵana kirip tamaqtanady jáne keıin bul meniki bolady. Sen maǵan aqyl úıretpeı-aq qoı" dep ony dámhanadan qýyp shyǵady. Montero muny da kútpegen edi. Ol taǵy da birneshe dámhanasyna kirdi. Bárinde birdeı jaǵdaı qaıtalanyp otyrdy. Eń sońynda taǵy bir elıtalyq aýdandaǵy aqqýlar júzip júretin kóldiń qasynda ornalasqan dámhanasyna bardy.

Bul joly da burynǵydaı bolady dep ishteı daıyndyqpen kirdi. Biraq olaı bolmaı shyqty. Esikten kirgen soń, menedjer ony kórdi de, "Sizge ne kerek, myrza" dedi óte jaqsy kóńil aýdaryp. Montero qarny ashqanyn, tamaq jegisi keletinin, biraq aqshasy joq ekenin aıtty. Menedjer "Kúte turyńyz. Oryn bosasyn. Bosaǵanda sizdi shaqyramyn" dedi. Montero onyń aıtqany boıynsha syrtta kútti. Bir jarym saǵat kútken soń, ol sypaıy túrde dámhanadan shyǵaryp jibergen eken ǵoı dep ketpek boldy. Alaıda sol kezde menedjer ony shaqyrdy. Ishke kirse, dámhananyń bir buryshyndaǵy ústel daıyn bolǵan, ústeldiń ústi tolǵan tamaq.

Montero tamaq ishkende menedjer onyń qasyna kelip otyrdy da, óz oqıǵasyn aıtty. "Meniń atym Moheo. Osy dámhanada jumys istegenime eki jyl boldy. Men buryn tabysty kásipker boldym. Bári jaqsy bolyp kele jatqanda kólik apatyna ushyrap, áıelim qaıtys boldy jáne apattan keıin kútpegen tólemder tóledim. Búkil jıǵan, tergenimdi sattym. Bári joq boldy. Sodan ishimdikke salynyp kettim. Dalada panasyz qaldym. Bir kúni osy dámhanaǵa keldim. Dámhananyń ıesi maǵan tegin tamaq berip qarnymdy toıdyrdy jáne jumysqa aldy. Sodan beri ómirim qaıta jaqsy jolǵa tústi. Sen de kezindegi men sııaqty ekenińdi túsinip otyrmyn. Erteńnen bastap osy dámhanaǵa jumysqa kel" dedi. Montero bul jigitti esine aldy: eki jyldyń aldynda shynymen solaı istegen edi.

Sonymen ertesi Montero shynymen keldi. Biraq dámhanaǵa jumysqa kelmegen edi. Montero búkil dámhanalarǵa reforma jasaý úshin keldi. Búkil qyzmetkerler men menedjerlerdi jınap, adamdardy statýsyna qarap baǵalaıtyndardy jumystan shyǵardy, al jaqsy qyzmet kórsetkenderdi jaýapty orynǵa qoıdy. Burynǵy senimdi kómekshisi Tomasqa da qosh aıtyp, jolǵa saldy. Ornyna Moheony qoıdy.

Iá, bul shyn ómirde Ispanııada bolǵan oqıǵa.