Almaty oblysy Kegen aýdany Shyrǵanaq aýylynyń ákimi saılaýynan keıin shyqqan shý basylar emes. Shyrǵanaqqa arnaıy baryp qaıtqan Qamshy tilshilerine turǵyndar "jańa taǵaıyndalǵan ákimdi qabyldamaımyz" 5 sáýir kúngi aýyl ákiminiń saılaýy ádil ótpedi, saılaý nátıjesi zańsyz. Sonymen qatar "Jergilikti ózin-ózi basqarý týraly" zańnyń 36-baby buzyldy» dep shaǵymdaryn jetkizgen. Oblys basshylyǵynan qozǵaý bolmaǵanyn aıtqan turǵyndar endi prezıdent Q. Toqaevtan kómek suraıdy. Shyrǵanaq turǵyndary ashyq hatynyń tolyq nusqasy tómende usynylyp otyr.

Qurmetti prezıdent! Sizdiń 2020 jylǵy 1 qyrkúıektegi Qazaqstan halqyna joldaýyńyzdy elimizdiń basqa da respýblıka óńirlerimen qatar biz de qýanyp qarsy alǵan edik. Ásirese "Aýyl sharýashylyǵyn damytpaı, básekege qabiletti ekonomıka qurý múmkin emes, sol sharanyń alǵashqy qadamy retinde jergilikti bılik ókilderiniń saılanbaly bolýynan bastaýymyz kerek" degen úndeýińiz – qarapaıym halyqtyń kóńilinen birden shyqty. Sebebi, aýyl ákimderin tikeleı saılaý – aýyl azamattaryna ózderiniń konstıtýsııalyq quqyǵyn tolyqqandy iske asyrýǵa múmkindik beredi jáne de "Halyq únine qulaq asatyn memleket" tujyrymdamasynyń oryndalýynyń aıqyn kórinisi bolar edi. Árıne, atalǵan sharanyń daıyndalýyna, túsindirilýine, atqarylýyna aldymen oblys jáne aýdan ákimderi, máslıhat depýttattary múddeli bolýǵa tıis jáne jasaǵan sharalaryn joldaý shyǵa sala bolashaq zańmen bir baǵyta órbitýi kerek edi.

Alaıda, sizdiń joldaýyńyzdan álde habary joq pa, álde sizge degen tikeleı qarsylyqtary bar ma, aýyl ákimderdin saılaý kezinde Almaty oblysy Kegen aýdanynyń ákimi, Saılaý komıssııasy jáne aýdandyq máslıhat kópe-kórneý zań buzýshylyq jasap, aýyldyq okrýgterdiń azamattarymen, zań boıynsha qarastyrylǵan jergilikti qoǵamdyq uıymdarymen sanaspaı, aýyl ákimderi etip ózderiniń adamdaryn taǵaıyndap jatyr. Osylaısha aýdanda jemqorlyqtyń taralýyna jaǵdaı jasaýda.

 

Jaǵdaıdy basynan baıandaı ketsek, 2021 jylǵy naýryz aıynyń 10-da aýylymyzda kenetten Kegen aýdan ákiminiń orynbasary Eleýsizova Bota Serikqyzynyń, aýdan ákimi apparatynyń basshysy Isaev Medet Shaıytqanulynyń uıymdastyrýymenen 5 mınýttyq aýyl jınalysy bolyp ótti. Jıynǵa turǵyndar tarapynan ákimshilik qyzmetkeri Muqanova Marjan, aqsaqaldar alqasy tóraǵasy Qurmanǵalıev Ermahan, aqsaqaldar uıymy múshesi Qydyrov Joldybaı, analar keńesi tóraıymy Roza Batyrhanova, Mektep dırektory Mýsaeva Qýan, Imam Naızabekov Alıasqar, Emhana meńgerýshisi Mýsekeeva Farıda, Kitaphana meńgerýshisi Qusaıynov Darıǵa qatysady. Kún tártibinde bolǵan jalǵyz másele – Aýyl ákimine úmitkerler olardyń qatystyrylýynsyz tanystyryldy. Jınalysqa jalpy Aýdan qyzmetkerlerimen qosa 10 adam qatysqan, olardyń ishinde 8-i aýyl turǵyny. Al ishindegi tek 3-eýi (42%) ǵana 7 adamnan qurylatyn aýyldyq qoǵamdyq uıym músheleri.

 

Artynan, naýryz aıynyń 25 kúni, aýdan ortalyǵy Kegen aýylynda aýdandyq máslıhat turaqty komıssııalarynyń birlesken otyrysy ótedi. Komıssııa tóraǵasy bolyp Másimbaev Bilál Áýkenuly saılanady da sol kúni birden tórt másele kún tártibinde qaralady: 1. Kegen, Saty, Qarabulaq aýyldyq okrýgteriniń 2020 jyly óz quzireti shegindegi atqarǵan jumystary týraly esepteri, 2-shisi – "Veterınarııa týraly" QR 2002 jylǵy 10 shildedegi № 399 Zańynyń aýdan kóleminde oryndalý barysy men ony júzege asyrýdaǵy alda turǵan mindetter týraly Tókenov Q.Iа. baıandamasy, 3-shisi – aýdannyń "Dene shynyqtyrý jáne sport bólimi" MM-niń 2020 jyly atqarǵan jumystary jáne alda turǵan mindetteri týraly esebi. 4-shisi – aýdandyq máslıhat depýtattary jınalysynyń bitýine bar-joǵy 30 mınýt qalǵanda joǵaryda aıtylǵan 10 naýyryzdaǵy tizimge sáıkes Shyrǵanaq aýyldyq okrýginiń ákimine úmitkerlerdiń saılaýaldy baǵdarlamalaryna tyndaý jasalynady (Ár kandıdatqa tek 10 mınýttan ýaqyt bólinedi). Iаǵnı, Shyrǵanaq aýylynyń jańa ákimi Sarybaev Ernat Sanaqbaıulynyń, burynǵy ákim Bekbatyrov Orazbaıdyń jáne taǵy bir úmitker Seıitqazyuly Jomarttyń alǵash ret saılaýaldy baǵdarlamalary sol jerde ǵana alǵash tyńdalady.

 

Keıinnen 5 sáýir kúni, Kegen aýdandyq máslıhat otyrysynda aýyldyq okrýgimizge əkim saılaýy ótedi. Bas aıaǵy 15-20 mınýttyń ishinde Shyrǵanaq aýyldyq okrýginiń burynǵy əkimi, sol aýyldyń týmasy, Orazbaı Bekbatyrov ornynan ketip, Kegen aýdanyndaǵy 12 okrýg ishindegi eń aýmaqty, halqy jaǵynan da, jeri jaǵynan da, tarıhı taǵylymy jaǵynan da aldyńǵy oryndaǵy aýylymyzǵa, buryn-sońdy kelip, aýylǵa at basyn da tiremegen, baǵdarlamasymen tanystyrmaǵan, Aýyl tirshiliginen habary joq Sarybaev Ernat Sanaqbaıulyn ákimdikke kenet taǵaıyndaıdy.

 

Osy tusta aýyl turǵyndary ózińizge ótkizilgen saılaý qorytyndysymen kelesideı negizde kelispeıtinin jáne zańbuzýshylyqtar bolǵanyn qulaǵdar etip, arasha suraıdy:

1. Qazaqstan Respýblıkasynyń 2001 jylǵy 23 qańtardaǵy jergilikti memlekettik jáne ózin-ózi basqarý týraly N 148 Zańnyń 36-baby buzylǵan. Atalǵan bapta aýyldyq okrýg ákimin aýdannyń máslıhaty aýdan ákimi usynǵan jáne jergilikti qoǵamdastyq uıymdarmen kelisilgen kandıdatýralar arasynan balamaly negizde tórt jyl merzimge qyzmetke saılaıdy delingen. Joǵaryda baıandalǵandaı, Aýdan ákimdigi 2021 jyldyń naýryz aıynyń 10-ynda ótkizgen aýyl kandıdattardyn tanystyrý jıylysyn qoǵamdyq uıymdarmen kelisilgen jıylys dep búginde zań buzyp otyr. Jıylysqa ákim qyzmetine kandıdattar qatystyrylmasa, aýyldaǵy qoǵamdyq uıym músheleriniń ishinde bar-joǵy 7 adamnan qurylǵan uıym músheleriniń 3-eýi ǵana qatysqan bolsa jáne jergilikti qoǵamdyq uıym músheleriniń qoldary hattamaǵa qoıylmasa, ıaǵnı kelisilmegen bolsa, onda ákimdik saılaý – zańsyz.

2. Máslıhat – óziniń aýdandyq ákimdikti qadaǵalaýshy fýnksııasynan aıyryp otyr aýdanda. Sebebi aýdandyq máslıhatty qurap otyrǵan 12 depýtattyń 10-y aýdan basshylyǵyna baǵynyshty mekeme basshylary men qyzmetkerleri, balabaqsha men mektep jáne HQKO jumysshylary. Olardyń bólekshe oıy, jeke kózqarasy joq. Aýdan ákimi ne aıtsa-sony oryndaıdy. Sebebi – jalaqysyn memlekettik kommýnaldyq kásiporyndardan alyp otyr. Atalǵan depýtattardyń turǵylyqty mekenderi – aýdan ortalyǵy Kegen aýylynan bolýy, elim men jerim, aýylym dep júrgen qalǵan 34 eldi mekenniń, 12 aýyldyq okrýgtiń aptal azamattary men óz oıy, jeke órisi bar táýelsiz turǵyndarynyń ashý-yzasyn keltirýde. Saılanyp jatqan aýyl ákimdikterine Aýdandyq ákimdikke týys adamdardyń ótip ketýi – tamyryn jaıǵan jemqorlyqtyń aıǵaǵy!

Joǵarydaǵy aıtylǵandardy eskere kele, aýyl turǵyndary máslıhat depýttatarynyń 5 sáýirdegi aýyl ákimin saılaýyn zańsyz dep tanýyńyzdy jáne aýdan ákimine baǵynyshty jasaqtalǵan aýdandyq máslıhatty tarqatyp, táýelsiz múshelerden qaıta jasaqtaýyńyzdy suraımyz

Aýyl turǵyndary jáne Qoǵamdyq uıym músheleri

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir