Búgin parlament májilisiniń jalpy otyrysynda depýtat Ǵalymjan Eleýov dárimen qamtamasyz etý máselesin kóterip, densaýlyq saqtaý mınıstrine depýtattyq saýal joldady.

Depýtattyń aıtýynsha, aýyr dıagnozdary bar adamdarǵa asa mańyzdy preparattar ýaqytynda jetkizilmeı jatyr. Búginde sáýir aıynyń ortasy bolǵanymen, tizimdegi 70-ke jýyq preparat áli kúnge deıin satyp alynbaǵan.

Sonymen birge osy 70 preparattan basqa, satyp alyndy dep kórsetilgen 45 preparattyń alǵashqy jetkizilý merzimi sáýir aıynan bastalady, al keıbireýler 2021 jyldyń qazan aıynan bastap jetkizilmek.

Osy rette, Ǵalymjan Eleýov 2021 jylǵa arnalǵan biryńǵaı dıstrıbıýtordan satyp alynatyn dárilik zattardyń, medısınalyq buıymdardyń tizimi Densaýlyq saqtaý mınıstrliginiń buıryǵymen 2020 jyldyń 28 shildesinde bekitilgenin atap ótti.

Iаǵnı,  2021 jyldyń bastalýyna deıin halyqty tegin dárilik quraldarmen qamtamasyz etý boıynsha mindet aldyn ala belgilendi.

– Búgingi kúni onkologııalyq aýrýhanalardyń esebinde 180 myńnan astam azamat tirkelgen. О́kinishke qaraı, jyl saıyn elimizde olardyń qatary 30 myń adamǵa kóbeıýde. Bul naýqastarǵa arnalǵan dárilerdiń tipti 10 kúnge keshigip jetkizilýi aýyr jaǵdaıǵa alyp kelýi múmkin.

Osyǵan qaramastan meniń resmı saýaldaryma SK-Farmasııa aqparaty boıynsha onkologııalyq naýqastar úshin L-asparagınaza, Vınblastın, Denozýmab, Metotreksat, Sıklofosfamıd sekildi isikke qarsy preparattar satyp alynbaǵan, – dedi depýtat.

Ǵ.Eleýovtyń aıtýynsha, týberkýlezge shaldyqqan naýqastardyń da jaǵdaıy aýyr, sebebi Izonıazıd, Protıonamıd, Rıfampısın ýaqytynda ákelinbegen.

Osy rette, Qazaqstanda tynys alý organdarynyń aýrýlarynan qaıtys bolǵan adamdardyń sany óte kóp ekenin alǵa tartqan depýtat bronh demikpesine jáne ókpeniń sozylmaly obstrýktıvti aýrýyna shaldyqqan naýqastar dárilermen tolyq emes kólemde qamtamasyz etilgenine, Vılanterol, Flýtıkazona fýroat, Sýrfaktant, Teofıllın satyp alynbaǵanyna nazar aýdardy.

– Sondaı-aq 1 jáne 2 tıpti qant dıabetimen aýyratyn adamdar Insýlın glýlızınmen qamtamasyz etilmegen. Keıbir neıroleptıkter men epılepsııaǵa qarsy quraldar satyp alynbady. Jıi kezde olar Qazaqstannyń dárihanalarynda satylmaıdy, halyq amalyn taýyp, olardy kórshiles respýblıkalardan tanystar arqyly zańsyz aldyrýǵa májbúr, – dedi Ǵ. Eleýov.

Sonymen qatar, depýtat Ulttyq ekpeler kúntizbesine sáıkes 2, 3, 4, 18 aıdaǵy balalarǵa jáne 6 jastaǵy balalarǵa qoıylatyn dıfterııaǵa, kókjótelge, sirespege, polıomıelıtke qarsy ekpeni satyp alý boıynsha ótkizilmegen konkýrs erekshe alańdaýshylyqty týdyratynyn jetkizdi.

Joǵaryda baıandalǵannyń negizinde Densaýlyq saqtaý mınıstrliginen tegin medısınalyq kómektiń kepildik berilgen kólemi sheńberinde jáne mindetti áleýmettik medısınalyq saqtandyrý júıesi boıynsha dárilik preparattardyń tolyq kólemde satyp alynýyn qamtamasyz etýdi, dári-dármekterdi ýaqytynda emes jáne tolyq emes kólemde jetkizý máselesin, birinshi jetkizýdiń kesh merzimin sheshý týraly ýákiletti organ qandaı sharalardy qabyldaıtynyn túsindirýdi jáne basqarýshylyq sheshimderdiń qabyldanýyn uzartyp jatqan tulǵalardyń jaýapkershiligi týraly aqparat berýdi talap etti.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir