• USD 468.56

  • EUR 497.56

  • RUB 7.3

  • CNY 67.18

28 Naýryz, 14:31:45
Almaty
+35°
Shyǵysqazaqstandyq aqyn Serik Qusanbaev facebook-ta jýyrda ǵana Shyǵys Qazaqstan oblysy densaýlyq saqtaý basqarmasynyń basshysy laýazymyna taǵaıyndalǵan  Ermek Omarbekov qazaq tilinde suhbat bere almaǵanyn aıtyp, memlekettik qyzmetke taǵaıyndalatyn kez kelgen adam memlekettik tildi bilýge tıistigi týraly zań qabyldaý qajettigin jetkizdi.
 
"Bir top telejýrnalıstiń orys tilinde qoıǵan saýaldaryna oryssha jaýap berip turǵan basqarma basshysyna qazaq jýrnalısteriniń biri:
 
– Ermek Sembaıuly! Osy aıtqandaryńyzdy qazaq tilinde qysqasha aıtyp bermeısiz be? – dep ótinish jasap edi, álgi "qazaq azamatymyz" boıyn tok soǵyp ótkendeı selk ete qaldy.
 
Sóıtti de: – Jo – jo – joq, aıtyp bere almaımyn! – dep at tonyn ala qashty da, burylyp ap jónine ketti. Qazaq tildi jýrnalıst qanshama áriptesteriniń aldynda jer bolyp qala berdi... Mine, bizdiń "Azamatym!" dep ishimiz jylyp, kóńilimizge jaqyn tartqan qandasymyzdyń ana sútimen daryǵan ana tiline, qala berdi bildeı bir memlekettiń memlekettik tiline degen qurmeti.
 
Bul sonda qalaı bolǵany? Partııalyq tizimmen esh qıyndyqsyz oınap-kúlip júrip Parlament tórinen oryn alǵan depýtattarymyz myńqyldap ant bere almasa, jergilikti densaýlyq salasynyń basshysy "Memlekettik tilde suhbat bermeımin!" dep kergıtin bolsa, biz osy "Til! Til!" dep nesine 30 jyldan beri aq ter, kók ter bop júrmiz? Bul degenińiz – baryp turǵan beıbastaqtyq, qazaq deıtin memleketquraýshy tutas bir ulttyń tilin, abyroıy men namysyn kózimizdi baqyraıtyp qoıyp qorlaý, tabanǵa salyp turyp taptaý emes pe?" deıdi ashynǵan aqyn.
 
Serik Qusanbaev "Omarbekov sekildi óz tilinen bezingenderdi kórgende" túńilip ketetinin aıtyp, "Tálimin ap ákeı menen shesheıdiń, Bala boldym, sol qoǵamda eseıdim. Júrip-júrip oıǵa qalam keı kúni, Bizge osy qazaq tili qajet pe, Memlekettik tili barda Reseıdiń...? – deıtin kún shynymen de taıap qaldy ma...?" dep alańdaýshylyǵyn bildiredi.
 
Aqyn sóz sońynda "memlekettik qyzmetke taǵaıyndalatyn kez kelgen ulttyń ókili memlekettik tildi jetik meńgermegen bolsa, ol adam qyzmetke qabyldanýǵa eshqandaı quqy bolmaýy kerek!" degen suraqty parlamenttiń kún tártibine qoıyp, úkimetten zańdy túrde talap etetin ýaqyt jetti" deıdi.
 
Qazaqstanda qazaq tiliniń qoldanysyn keńeıtý týraly 30 jyldan beri aıtylyp keledi. Alaıda qoǵamda qazaq tili tolyqtaı qoldanys quralyna aınalǵan joq. Áli kúnge deıin qalalar men ortalyq, shyǵys jáne soltústik óńirlerde azamattar memlekettik tilde sóıleı bermeıdi, qyzmet alý kezinde de qıyndyqtar jıi kezdesedi. Memlekettik qyzmette memlekettik tilge shorqaq mamandar bar. Bıylǵy qańtarda májilistiń jańa quramyna engen keı depýtattar qazaqsha ant berý kezinde sózderin qaıta-qaıta umytyp, jazyp alǵan sózderin ejiktep oqyǵan, keı sózderge tili kelmeı, maǵynasyn buzyn aıtqan.
 
Jýyrda ǵana Til maıdany qozǵalysy Nur-Sultan qalasyndaǵy dúkenderdiń birinde qazaq tilinde qyzmet kórsetýdi suraǵan qarııany kúzetshi "arandatýshysyń" dep ıterip jibergenin habarlaǵan.
 
Artynsha Bas prokýrordyń orynbasary Bolat Dembaev májiliste depýtattardyń qazaqsha qoıǵan suraǵyna jaýap bere almaǵany beınelengen vıdeo tarady. 
 
Jaqynda májilis depýtaty Qazybek Isa sottar men quqyq qorǵaý organdarynyń qyzmetkerlerin jáne barlyq memlekettik qyzmetkerlerdi qazaq tilin bilýge mindetteý kerek ekenin aıtyp, úkimet basshysy Asqar Mamınge depýtattyq saýal joldaǵan.
 
"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir