Elordalyq mektepterge Mustafa Shoqaı, Qanysh Sátbaevtyń esimi berilmek

Premer-mınıstrdiń orynbasary Eraly Toǵjanov Qazaqstannyń bostandyǵy men táýelsizdigi jolynda qýǵyn-súrgin qurbandary bolǵan azamattardyń eńbegi men erlikterin máńgi este qaldyrý jónindegi arnaıy joba ázirlenip jatqanyn habarlady.

Onyń aıtýynsha, búginde Nur-Sultan qalasynda "Alash" qozǵalysynyń 30 shaqty tulǵasyna kóshe ataýlary berilgen. Onyń ishinde, Maǵjan Jumabaev, Álıhan Bókeıhan, Ahmet Baıtursynuly, Álıhan Ermekov, Jahansha Dosmuhameduly, Mustafa Shoqaı, Halel Dosmuhameduly, Halel Ǵabbasuly, Ýálıthan Tanashuly, Aıdarhan Turlybaıuly, Muhamedjan Tynyshbaıuly, Jaqyp Aqbaıuly, Aspandııar Kenjeuly, Mirjaqyp Dýlatuly, Qoshke Kemeńgeruly, Ǵumar Qarash, Shákárim Qudaıberdiuly, Sháımerden Qosshyǵululy, Sultanbek Qojanuly, Birimjanovtar, Názir Tórequluly, Smaǵul Sadýaqasuly, Haıretdın Bolǵanbaıuly, Sultanmahmut Toraıǵyruly, Júsipbek Aımaýytuly, Teljan Shonanuly, Qanysh Sátbaev, Muhtar Áýezov atyndaǵy kósheler bar.

– Elimizdiń azattyǵy úshin kúresken Alash qaıratkerleriniń esimderin máńgilik este saqtaý maqsatynda 2020 jyly Nur-Sultan qalasynyń bilim berý uıymdaryna Ahmet Baıtursynulynyń, Álıhan Bókeıhannyń, Shákárimniń esimderi berildi. Qazirgi ýaqytta Táýelsizdigimizdiń 30 jyldyq mereıtoıy qarsańynda elordanyń birqatar bilim berý mekemelerine Názir Tórequlovtyń, Mustafa Shoqaıdyń, Qoshke Kemeńgerulynyń, Qanysh Sátbaevtyń, Smaǵul Sádýaqasulynyń esimderin berý máselesi qarastyrylýda, – dedi ol Aqjol partııasynyń depýtattary joldaǵan depýttattyq saýalǵa jaýabynda.

Sondaı-aq Eraly Toǵjanov memlekettik hatshynyń tóraǵalyǵymen Saıası qýǵyn-súrgin qurbandaryn tolyq aqtaý jónindegi memlekettik komıssııa qurylǵanyn, onyń quramyna qoǵamdyq uıymdardyń ókilderi men ǵalymdar, prezıdent ákimshiligi men úkimet ókilderi, depýtattary, múddeli memlekettik organdardyń basshylary kirgenin aıtty.

Muraǵat kózderi men basqa da materıaldardy jınaý, zerdeleý, memlekettik komıssııaǵa qorytyndylar daıyndaý jónindegi 11 baǵyt boıynsha jumys toptarynyń quramy bekitilgen. 

– Sizderdiń 700-den astam tulǵany quraıtyn Alash qaıratkerleriniń tizimi Memlekettik komıssııa qyzmetin súıemeldeý jónindegi jobalyq ofıske, sonymen birge tıisti jumys tobyna joldanyp, qaraý nátıjeleri ǵalymdardyń muraǵattarda júrgizgen jumys qorytyndylaryna sáıkes usynylatyn bolady. Jalpy, barlyq zertteý jáne izdestirý jumystary aıaqtalǵannan keıin Qazaqstannyń bostandyǵy men táýelsizdigi jolynda qýǵyn-súrgin qurbandary bolǵan azamattardyń eńbegi men erlikterin máńgi este qaldyrý jónindegi arnaıy joba ázirleý josparlanýda, – dedi ol.