Mamın tapsyrmasy: Aı saıyn 2 mln adamǵa vaksına salynýy kerek

Bıyl sáýir, mamyr jáne maýsym aılarynda óńirlerde aı saıyn 2 mln adamǵa vaksına salý múmkindigi qamtamasyz etiledi. Bul týraly úkimet otyrysynda premer-mınıstr Asqar Mamın aıtty.

– Qazirgi bizdiń basty mindetimiz – sanıtarlyq-epıdemıologııalyq jaǵdaıdy turaqtandyrý jáne vaksına salǵandardyń sanyn arttyrý. Osy baǵytta naqty jumys uıymdastyryldy. Mınıstrlik vaksınasııalaý boıynsha jospar ázirledi. Bıyl sáýir, mamyr jáne maýsym aılar aralyǵynda óńirlerde aı saıyn 2 mln adamǵa vaksına salý múmkindigi qamtamasyz etiledi.

Qyrkúıek aıynda 10 mıllıonǵa jýyq adamǵa vaksına salýdy aıaqtaýdy josparlap otyrmyz. Sodan keıin ujymdyq ımmýnıtettiń jınaqtaýshy áseri kútiledi, – dedi úkimet basshysy.

Sonymen qatar Mamın mınıstrlikter men ákimdikterge birqatar tapsyrmalar berdi.

– Densaýlyq saqtaý mınıstrligine, ákimdikterge vaksına alatyndardyń sanyn arttyrý boıynsha is-sharalar qabyldaýdy jáne óńirlerge vaksınasııalaý josparyna sáıkes vaksınany jetkizýdi qamtamasyz etýdi tapsyramyn.

Aqparat jáne qoǵamdyq damý mınıstrligi medıa-jospardy jańartsyn jáne densaýlyq saqtaý mınıstrligimen, ákimdiktermen birlesip vaksınasııalaýdyń mańyzdylyǵy týraly aqparattyq-túsindirý jumystaryn keńinen júrgizsin, – dedi premer-mınıstr úkimet otyrysynda.