Bilim mınıstrligi bıylǵy UBT-daǵy jańa ózgeristerdi aıtty

Bilim jáne ǵylym vıse-mınıstri Sholpan Karınova bıyl ulttyq biryńǵaı testileý elektrondyq formatta ótkizý josparlanyp otyrǵanyn aıtty. Bul týraly ol ortalyq kommýnıkasııalar alańynda ótken brıfıngte málimdedi.

– UBT-ny elektrondyq formatta júrgizilý josparlanýda. 2004 jyldan beri ulttyq biryńǵaı testileý qaǵaz formatynda ótkizilip keledi. Bastapqyda UBT-ny ótkizý eki fýnksııany alyp júrdi. Birinshisi, mektep bitirýge baılanysty qorytyndy attestattaý jumystary men mektep bitirgeni jóninde attestat alý úshin jáne JOO túsýge memlekettik granttar konkýrsyna qatysý fýnksııasyn alyp júrgen bolatyn. Búgingi kúni UBT tek joǵary oqý oryndaryna túsý úshin memlekettik grantty jeńip alý konkýrsyna qatysý mehanızmi qyzmetin atqarady. Bul – álemdik praktıka, – dedi vıse-mınıstr.

Memlekettik bilim grantyn taǵaıyndaý konkýrsyna qatysý úshin UBT 15 sáýirde bastalyp, 30 maýsymǵa deıin jalǵasady. 

UBT-ǵa ótinishti http://app.testcenter.kz/ saıty arqyly berýge bolady.

"UBT elektrondyq formatta "bir testilenýshi – bir kompıýter – bir kamera" qaǵıdaty boıynsha uıymdastyrylady. Aýdıtorııada ne bolyp jatqanyn kórsetetin kameralardan basqa, testilenýshi otyratyn ár ústeldiń ústinde taǵy bir kamera ornatylady. Proktorıng pen beınebaqylaýdyń zamanaýı júıesi jáne UBT-da bógde adamdardy boldyrmaý úshin Face ID sıfrlyq sáıkestendirý qurylǵysy paıdalanylady" delingen resmı saıt taratqan habarlamada.

Mınıstrliktiń málimdeýinshe, grant utyp alý úshin talapkerler UBT-ny eki ret tapsyra alady.

• talapker sáýir aıynda testileýden ótken bolsa, onyń UBT-ny ekinshi ret birneshe kúnnen keıin nemese mamyr, ne maýsym aılarynda tapsyrý múmkindigi bolady;
• Memlekettik bilim berý grantyn alý konkýrsyna qatysý úshin oqýǵa túsýshi eń jaqsy nátıjesi bar sertıfıkatty usyna alady;
• Testileýge 4 saǵat (240 mınýt) beriledi. UBT nátıjesi boıynsha talapkerler eń joǵary 140 ball jınaı alady;
• Qatysýshylar tapsyrmalardy kez kelgen pánnen bastaı alady. Sondaı-aq testileý aıaqtalǵanǵa deıin jaýap berilgen suraqtarǵa qaıta oralyp, jaýaptardy túzetýge bolady. Talapkerlerge yńǵaıly bolý úshin UBT barysynda kompıýter ekranynda kalkýlıator, Mendeleev jáne tuzdardyń erigishtigi kesteleri qoljetimdi bolady;
• Testileýdiń 60 mınýtynan keıin oqýshylarǵa kózge arnalǵan jáne dene jattyǵýlaryn oryndaý úshin eki mınýttyq úzilis, 120 mınýttan keıin 15 mınýttyq úzilis beriledi;
• UBT nátıjelerin testileý aıaqtalǵannan keıin birden bilýge bolady. Testileý qorytyndysy boıynsha jınalǵan upaı sany ekranǵa shyǵarylady. Sondaı-aq UBT qatysýshysy qandaı suraqtarǵa qate jaýap bergenin birden kóre alady;
• UBT nátıjelerimen kelispegen jaǵdaıda talapker kelesi kúndi kútpeı-aq apellıasııaǵa ótinish bere alady.