Túrkistanda qymbat kólikterdi urlaýmen aınalysqan 4 adam ustaldy

Túrkistan oblysynyń polıseıleri qymbat avtokólik urlaýmen aınalysqan tórt kúdiktini anyqtady, dep habarlady Polisia.kz.

Túrkistan qalalyq polısııa basqarmasyna jergilikti turǵyn belgisiz adamdar onyń "Toyota Camry 55" markaly avtokóligin urlap ketkeni týraly aryzdanǵan. Polıseıler birden oqıǵa ornyna kelip, kúdiktilerdi jedel izdestirýge kirisken. 

Nátıjesinde urlanǵan avtokólik Shymkent qalasynan tabyldy. Ony kúdiktiler tórt mıllıon teńgege satyp úlgergen. Al avtokóliktiń esigin, elektrondyq skaner apparaty arqyly ashqan.

– Arnaıy júrgizilgen operasııa nátıjesinde bizdiń jedel ýákilder tórt kúdiktini ustady. Olardyń tórteýi Aqtóbe oblysynyń turǵyndary, onyń ishinde ekeýi destrýktıvti dinı aǵymnyń músheleri bolyp shyqty. Ustalǵandardyń úsheýi buryn qaraqshylyq jáne qarý saqtaǵany úshin sottalǵan. Kúdiktiler qamaýǵa alyndy. Tergeý barysynda qylmystyq top músheleriniń aldyn-ala josparlanǵan syzba boıynsha, árqaısysy óz rólin somdaý arqyly áreket etkeni anyqtaldy. Kúdiktiler quny 10 mıllıon teńgeden asatyn avtokólikterdi arnaıy skanerleý qurylǵysynyń kómegimen ashqan. Olar avtokólik ıelerin baqylap, esikterin ashqan kezde elektrondy qulyptardy skanerlegen. Seziktiler qymbat kólikke qol jetkizgennen keıin, olardy turaqtan nemese kóshelerden urlap, aıdap áketken. Tergeý búgingi kúni kúdiktilerdiń avtokólik urlyǵynyń jalpy bes deregine qatysy bary anyqtady. Olar bes qylmystyń ekeýin Aqtóbe oblysynda, ekeýin Túrkistan oblysynda jáne bireýin Qyzylorda oblysynda jasaǵan. Qazirgi ýaqytta sotqa deıingi tergeý jumystary jalǵasýda. Sondaı-aq kúdiktilerdiń basqa da osyndaı qylmystarǵa qatysy bar-joǵy anyqtalýda, – dedi Túrkistan oblysy polısııa departamenti bastyǵynyń orynbasary Qurmanbek Sahov