"Tym qatań dep sanaımyz". Almatylyq kásipkerler Bekshınge úndeý joldady

"Atameken" ulttyq kásipkerler palatasy, Almatynyń bas sanıtar dárigeri Jandarbek Bekshınnen qaladaǵy karantın sharalaryn qaıta qaraýdy surady, dep habarlady atameken.kz saıty. 

"Almaty qalasy bas sanıtar dárigeriniń 2021 jylǵy 19 naýryzdaǵy sheshimin tym qatań dep sanaımyz. Shekteýlerdi 12 sáýirge deıin uzartýǵa kásipkerler oryndy narazylyq bildirip jatyr. Almaty qalasy bas sanıtar dárigerine "qyzyl aımaqta" turǵan Nur-Sultan qalasyndaǵy algorıtmge sáıkes shekteý sharalaryn jumsartý úshin karantın talaptaryn qaıta qaraýdy usynamyz" delingen úndeý hatta. 

Kásipkerlerdiń basty talaby, bıznes pen jumys oryndaryn saqtap qalý úshin jumys isteýge múmkindik berý. 

"Atameken" UKP júrgizgen saýalnama nátıjesinde, eldegi bıznes ókilderi salyq jáne nesıe tólemderin keıinge shegerýdi, nesıe somasyn qaıta qarjylandyrýdy, salyq jáne eńbekaqy tóleý qorynyń tólemderinen bosatýdy surap otyr.

Sondaı-aq kásipkerler jalǵa alý quny jáne kommýnaldyq tólemderdi óteýge kómek qajet ekenin aıtyp, qyzmetkerleriniń memleketten 42 500 teńge kólemindegi áleýmettik kómek alýyna yqpal etip, tutynýshylyq nesıeleri boıynsha tólem merzimin keıinge shegerýdi surap otyr.