Jandarbek Bekshın beıneúndeý jasady

Almaty qalasynyń Bas memlekettik sanıtar dárigeri, sanıtarlyq-epıdemıologııalyq baqylaý departamentiniń basshysy Jandarbek Bekshın qala turǵyndaryn maska rejımin saqtap, áleýmettik qashyqty eskerip, adam kóp jınalatyn jerge barmaýǵa shaqyrdy.  

Almaty qyzyl aımaqta tur. Bıyl megapolıste KVI-di juqtyrǵan 12 800 adam tirkeldi. Mýtasııaǵa túsken shtamnyń baryn eskere otyryp, indetti juqtyrýdyń joǵary deńgeıi saqtalyp tur.

– О́zgerister baıqalǵan aımaqtardy genomdyq retke keltirý nátıjeleri belgili boldy – brıtanııalyq jáne ońtústik afrıkalyq koronavırýs shtamdaryna tán mýtasııalar anyqtaldy. Jańa shtamdardyń kontagıozy joǵary. Aldyńǵy bazalyq shtammen salystyrǵanda jańa shtammdardyń juqtyrý kórsetkishi 70%-ǵa deıin joǵary. Iаǵnı, bul ınfeksııa óte juqpaly. Osy jaǵdaı megapolıste anyqtalǵan ınfeksııalardyń órshýine ákeldi, – dedi ol.

Jandarbek Bekshın KVI-den qorǵaýdyń jalǵyz joly vaksınasııa ekenin eske salyp, sáýir aıynda vaksınalardyń jańa dozasy keletinin aıtty.

– Almatyda eki mıllıon turǵynnyń bar ekenin, sondaı-aq kóshi-qonnyń joǵary deńgeıin eskere otyryp, qazir jańa shtammdar aınalymy aıasynda barlyqtaryńyzdy da Kovıdke qarsy sharalardy kúsheıtýge shaqyramyn. Betperde rejımi men áleýmettik qashyqty saqtap, qoǵamdyq oryndarǵa barmaýǵa, adam kóp jınalatyn jerden aýlaq bolýǵa shaqyramyn, – dedi sanıtar dáriger.