Foto: Sarapshy Ǵalııa Ájenovanyń jeke muraǵatynan
"Ádil sóz" sóz bostandyǵyn qorǵaý halyqaralyq qorynyń sarapshysy Ǵalııa Ájenova erteńnen bastap kúshine enetin "Jýrnalısterdi akkredıtteý qaǵıdalaryn bekitý týraly" jańa ereje sóz bostandyǵyn shekteıdi dep sanaıdy.
Onyń aıtýynsha, jańa erejedegi "júrgizýshi" uǵymy budan buryn usynylǵan "moderator" ataýynyń ózgertilgen túri.
– Brıfıng kezinde jýrnalısterdiń sózin bólip, kedergi jasap, mıkrofondaryn óshirip qoıatyn jaǵdaı jıi bolatyn. Buǵan jýrnalıster udaıy shaǵymdanatyn. Sol shaǵymdardan keıin "moderatordy" "júrgizýshi" dep ózgertken túrleri ǵoı. Bılik osy ózgeris arqyly halyqqa shynaıy aqparat jetkizbeı, brıfıngter barysyn ózderi qurǵan ssenarıı boıynsha júrgizgileri keledi. Iаǵnı jańa erejege saı, jýrnalıster brıfıngtiń bekitilgen taqyryby aıasynda ǵana suraq qoıa alady. Eger olar taqyryptan aýytqysa, "siz brıfıngtiń tártibin buzdyńyz" deýi ábden múmkin, – deıdi sarapshy.
Qor ókili osy ereje sheneýnikterge arqasyn keńge salýǵa múmkindik beretinin aıtady.
– Sheneýnikter belgili taqyryp boıynsha ǵana daıyndalyp keledi. Tótesinen qoıylatyn suraqtardyń bolmaıtynyna senimdi bolyp otyrady. Tipti keıbir saýaldarǵa berer jaýaby bolmaǵan jaǵdaıda da esh saspaıdy. О́ıtkeni brıfıng júrgizýshisi ony qutqara salady, – dep atap ótti ol.
Ǵalııa Ájenovanyń aıtýynsha, jańa ereje karantın kezinde qabyldanýynyń ózindik astary bar.
– Elde lokdaýyn 28 naýryzǵa deıin jarııalandy, al ereje 27 naýryz, ıaǵnı erteń kúshine enedi. Uzaqqa sozylǵan saǵyz sekildi osy akkredıtteý erejesiniń áńgimesi 2013 jyly bastalyp, artynan 2018 jyly jalǵasyp, mine, endi 2021-de, jurttyń da, jýrnalısterdiń de júıkeleri tozyp, sharshaǵan, karantın mezgilinde júzege aspaq. Qarbalas kezde ony tyqpalaýdyń qajeti qansha? Búkil vedomstvolar jáne mınıstrlikterdiń saraptaýynan ótken, olarmen aqyldasqan, al negizgi qyzmetti atqaratyn jýrnalısterge usyný, aqyldasyp keńesýge múmkindik tappaǵan. Sonda bul karantın kezindegi túrli saýaldardan qorǵaný maqsatyndaǵy áreket pe?, – deıdi sarapshy.
Qor ókiliniń pikirinshe, Qazaqstanda jýrnalısterdiń quqyǵy jyldan jylǵa shektelip keledi. Máselen, keıbir tulǵalar, sheneýnikter, "ar-namysymdy, bedelimdi tómendetti, jala japty" dep jýrnalısti birden sotqa súıreıtin jaǵdaılar az emes. Mıtıng, beıbit jıyn, sporttyq jarystar, buqaralyq is-sharalar kezinde túsirilgen sýretter úshin de jýrnalısterdiń ústinen aryzdanǵan sátter ushyrasqan.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir