Ulttyq qaýipsizdik komıteti 3 adamdy qylmys jasaý sátinde ustady (vıdeo)

Almatyda sheteldik qylmystyq top ókilderi ustaldy. Bul týraly Ulttyq qaýipsizdik komıtetiniń resmı saıty habarlady.

"3 er adam, olardyń ekeýi Tájikstan jáne bireýi Grýzııa azamaty qala kásipkerlerine qatysty aýyr jáne asa aýyr qylmystar jasaýǵa daıyndalý kezinde ustaldy. Qylmystaryn iske asyrý úshin TUQT músheleri shekarany zańsyz kesip ótip, Qazaqstan aýmaǵynda astyrtyn bolǵan" delingen habarlamada.

Ustaý barysynda 2 jaýyngerlik tapansha, 1 kelte myltyq, olarǵa oq-dáriler, birneshe sýyq qarý jáne basqa da qarý-jaraq pen qylmys jasaý quraldary tabylyp, alyndy.

Qylmyskerler Almaty qalasynda tájik dıasporasynyń kásipkerlerine tıesili lombardtarǵa, aıyrbastaý pýnktteri men turǵyn úılerge birqatar qaraqshylyq shabýyl jasaý jáne urlaý úshin turaqty qylmystyq top qurýdy, sondaı-aq olardan turaqty negizde aqshalaı qarajat alý úshin olardy "qamqorlyqqa alýdy" rettep qoıýdy josparlaǵan.

2019 jyly qylmyskerlerdiń biri Qazaqstannyń quqyq qorǵaý organdary tarapynan jaýapqa tartylyp, elden shyǵarylǵan. Ustalǵandar buryn birneshe márte sottalǵan jáne "urylar qaýymdastyǵynyń" áreketine qatystary bolǵan.

Oolardyń biri Reseıde kisi óltirý boıynsha jazasyn ótegen. Ekeýiniń qylmystyq ortada "umtylýshylar" (zańdaǵy urylarǵa kandıdattar) mártebesi bar jáne "zańdaǵy urylar" Azız Batýkaevpen ("Azız"), Devıd Gerlıanımen ("Dato Svan", 2017 jyly UQK jaýapqa tartqan) jáne basqalarmen baılanysta bolǵan.

Qazirgi ýaqytta ustalǵandarǵa qatysty qylmystyq Kodekstiń 287-baby 3-tarmaǵy (qarýdy zańsyz saqtaý) boıynsha qylmystyq is qozǵaldy. Qylmystyq kodekstiń 392-baby (Memlekettik shekarany qasaqana zańsyz kesip ótý) boıynsha qylmystyq is qozǵaý týraly másele qaraldy.