• USD 424.85

  • EUR 504.21

  • RUB 5.84

  • CNY 65.86

19 Qazan, 17:50:17
Almaty
+15°

Byltyr jeltoqsan aıynda Shymkent qalasy Dene shynyqtyrý jáne sport basqarmasynyń basshysy Oleg Pochıvalovtyń qos azamattyǵy bary jaıynda derekter jarııalandy. Jarııalanǵan málimetterge sáıkes, Shymkent ákimdiginde basshylyq qyzmette júrgen memlekettik qyzmetshi – Reseı azamaty eken.

Sol kezde basqarmanyń baspasóz qyzmeti Pochıvalovqa qatysty taraǵan aqparatty joqqa shyǵaryp, onyń tek Qazaqstan azamaty ekenin habarlady.

Arada bir jarym aı ýaqyt ótken soń, Shymkent qalasy polısııa departamentindegiler qalalyq Dene shynyqtyrý jáne sport basqarmasynyń basshysy Oleg Pochıvalovtyń qos azamattyǵy baryn rastap, ony Qazaqstan azamattyǵynan aıyrý jaıtyn tirkeıdi.

Osy jaǵdaıdan keıin shymkenttik sheneýnik ózine «Qos eldiń azamattyǵyn alǵan» dep aıyp taqqan Shymkent qalasynyń kóshi-qon polısııasynyń aqparatyn jalǵan dep jarııalap, sotqa talap aryz túsiredi. Tipti, BAQ ókilderine arnap brıfıng ótkizip, «eshqashan Reseı azamattyǵyn almaǵanyn» málimdeıdi. Sondaı-aq sot jumysy aıaqtalǵansha oǵan Qazaqstan azamattyǵy ýaqytsha qaıtarylǵan edi. Alaıda Ál-Farabı aýdandyq sotynyń sýdıasy onyń aryzyn qanaǵattandyrǵan joq.

3 naýryzda qala ákimi ókimimen basqarma basshysy Oleg Pochıvalovtyń 25 aqpanda qyzmetinen bosatylǵany habarlanady. Alaıda bul kezde Pochıvalov Eńbekke ýaqytsha jaramsyzdyq paraǵymen júrgen.

Sonymen, Shymkent sheneýnigi Oleg Pochıvalovtyń qos azamattyǵy jónindegi daý áli de saıabyrsyǵan joq. Sáýegeılik aıtýdan aýlaqpyz, biraq bul máselede bir bulyńǵyr dúnıe jatqan sekildi. Sonymen, basynan bastaıyn.

Áleýmettik jelilerde «Pochıvalovtyń Reseı azamattyǵy bar eken» degen habar burq ete qaldy dedik. Shamasy, bireý-mireý sol habardyń shyqqanyn kútip júrse kerek. Sol sol-aq eken, Shymkent qalasynyń kóshi-qon polısııasy bizdiń keıipkerimizdiń jaǵasyna jarmasa bastaıdy. Belgisiz bireýden belgili bireýge qoıyrtpaq qujattardyń kóshirmesi tizbektelip jetip keledi. Bir aýyz sózben aıtqanda onda «Oleg Pochıvalovtyń qos azamattyǵy bar» delingen. Dúdamal qaǵazdardy tııanaqty tekserýdiń ornyna, kóshi-qondaǵy «jigitter» alaýlatyp-jalaýlatyp, bizdiń keıipkerimizdi qurbandyqqa shalyp jiberedi.

Is nasyrǵa shaýyp, sotqa deıin barady! Álbette, qalalyq sport basqarmasynyń basshysy ar-namysyn qorǵap, sotqa shaǵymdanady. Biraq, Shymkent qalasynyń Ál-Farabı aýdandyq soty qabyldanǵan sheshimi týraly aqparatty óz saıtyna jedel shyǵaryp jiberedi. Qysqasy azamattyń aryzyn qabyldaýdan bas tartady. Endigi bir qyzyqty qarańyz. Bıylǵy jyldyń 21 qańtarynda qalalyq polısııa departamenti kóshi-qon qyzmeti basqarmasynyń bastyǵy S.Týgelbaevtyń qoly qoıylǵan qaǵazdy Pochıvalovtyń qolyna ustatyp jiberedi. Onda ol Reseı Federasııasy azamattyǵyn alýy sebepti 20 qańtardan bastap Qazaqstan Respýblıkasynyń azamattyǵyn joǵaltqany týraly jazba tirkelgen. Iаǵnı, Pochıvalov budan bylaı bizdiń elimizdiń azamaty emes degen sóz. Eń soraqysy budan eshkim eshqandaı túsinik alýǵa da talpynbaǵan. Árıne bul oqıǵa shymbaıyna batqan Pochıvalov Qazaqstan azamaty bolǵanyn jáne bolyp qala beretinin de aıtyp, baspasóz konferensııasyn shaqyrady. Sóıtip óz ustanymyn sotta dáleldegisi keledi. Sol kúni ol Shymkent polısııasy departamentiniń is-áreketteri zańsyz dep ál-Farabı aýdandyq sotyna shaǵymdanady.

Advokat Evgenıı Iаvorskııdyń pikirine júgineıik.

– Pochıvalovtyń Qazaqstan azamattyǵynan aıyrý týraly sheshimdi qabyldaýǵa ne túrtki bolǵany túsiniksiz. Onyń qolyna ustata qoıǵan habardyń ne basy, ne aıaǵy joq kádimgi hat dersiz. Tipti «Eskertý» degen sóz de joq. Kóshi-qon polısııasynyń qyzmetkerleri sotta Oleg Pochıvalovtyń qos azamattyǵy bar degen aıypty Ulttyq qaýipsizdik komıtetiniń, álde qandaı hatyna ıek artqan eken. Onda qaýipsizdik qyzmetkerleri osy máseleni tekserý jóninde usynys berse kerek. Qaıtalap aıtaıyq, azamattyǵynan aıyrý týraly sheshim shyǵarý týraly emes, tekserýdi ótingen. Pochıvalovtyń qorǵaýshylary Ulttyq qaýipsizdik komıtetine osy másele týraly suraý salady. Ústimizdegi jyldyń 11 aqpanynda mynandaı jaýap keledi. Qazaqstan Respýblıkasynyń Ulttyq qaýipsizdik komıteti O.V.Pochıvalovtyń jáne onyń otbasy múshelerine azamattyǵyna qatysty másele boıynsha Reseı Federasııasyna eshqandaı suraý salǵan emes.

Iаvorskıı taǵy birqatar túsiniksiz jáne bulyńǵyr qujattar tóńireginde oı qozǵaıdy.

– Men Pochıvalovtyń azamattyǵyn aıyrý týraly sheshim qabyldaýǵa negiz bolǵan resmı qujat týraly suraq týyndaǵan kezde, bizge Reseı Ishki ister mınıstrligi Krasnogorsk okrýgy boıynsha basqarma bastyǵy polısııa polkovnıgi N.Jýkovtyń qoly qoıylǵan jaýap keledi. Onda azamattyq týraly másele kóterilmegen. Ol 22 qańtarda jazylǵan. Kóshi-qon polısııasynyń ókilderi jalǵan qujatty sotta alǵa tartyp, azamattyqtan aıyrý jónindegi 2021 jylǵy 20 qańtardaǵy (ıaǵnı eki kún buryn!) №5 sheshimin shyǵarady. Onda kóshi-qon polısııasy birinshi basshysynyń buryshtamasy da bar. Al ol belgisiz bir sebeptermen bizge berilgen kóshirmede joq. Qysqasy, Pochıvalovtyń azamattyǵyna qatysty salynǵan suraýǵa nege ekenin belgisiz onyń áıeli men uly týraly derekter keltiriledi.

Árıne, osynaý qujattar bylyǵyna jol bergen qalalyq kóshi-qon polısııasynyń qyzmetkerlerine qatysty QR Qylmystyq Kodeksiniń 371-baby (salǵyrttyq) jáne 416-baby (dáleldemelerdi burmalaý) boıynsha eki qylmystyq is qozǵalady. Shymkent prokýratýrasy osy oǵashtyqtardyń oryn alǵanyn, munda álde qandaı qýlyqtyń jatqanyn, materıaldardyń burmalanǵanyn anyqtaıdy. Sóıtip, jalǵan aqpar taratqany úshin qylmystyq jaýapkershilikti kózdeıtin eki bap boıynsha is júrgizilýde. Advokat sýdıadan Reseıdiń kóshi-qon qyzmetine óz klıentiniń azamattyǵyn joǵaltýǵa negiz bolǵan qujattarynyń túpnusqalaryn usynýdy surap, suraý salady. Sotqa tıisti ótinish jiberiledi. Biraq sýdıa advokattyń ótinishin qabyldamaı, tipti túsinik berýden de bas tartady. Sonda adam taǵdyry qoıyrtpaq qujattardyń kóshirmeleri negizinde sheshilýge tıis pe? О́ıtkeni álgi iste mór soǵylǵan nemese qoly qoıylǵan birde-bir túpnusqa anyqtama joq. Istiń anyq-qanyǵyn odan ári naqtylaý úshin Reseıdiń kóshi-qon qyzmetine Pochıvalovqa qatysty tıisti suraý jiberiledi. Naqty jaýap Reseı Federasııasy Ishki ister Mınıstrligi kóshi-qon máseleleri jónindegi bas basqarmanyń bıylǵy 26 aqpandaǵy №3/217703201256 jaýap haty advokattyń qolyna tıip te úlgergen.

Al onda ne delingen deısiz ǵoı?

Bul suraqtyń jaýabyn Oleg Pochıvalov sotqa appelıasııalyq shaǵym túsirgen soń bereıik. Bul oqıǵaǵa bálkim sonda ǵana núkte qoıylsa kerek.

Ǵalymjan Meldeshov

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir