AQSh Gonkong máselesine qatysty Qytaıdy taǵy da synǵa aldy

AQSh Qytaıdy "Gonkongtaǵy demokratııalyq ınstıtýttarǵa qaýip tóndirdi" dep aıyptady. Jaqynda ǵana Beıjiń Gonkongtaǵy saılaý júıesin ózgertý josparyn jarııalaǵan.

Juma kúni búkilqytaılyq halyq jınalysy ótti.

Qabyldanǵan jańa ereje boıynsha, Gonkong assambleıasyna qatysatyn barlyq úmitkerlerdi Beıjińge adal músheler komıteti maquldaýy kerek.

Bul qadam byltyrǵy jyly qatań qaýipsizdik zańyn qabyldaǵannan keıin boldy.

Synshylardyń pikirinshe, Beıjiń dıssıdentterdi janshýda jáne Ulybrıtanııamen jasaǵan "bir el, eki júıe" kelisimin buzyp jatyr.

Beıjiń-London arasyndaǵy kelisimge sáıkes, burynǵy brıtan kolonııasy – Gonkong táýelsiz quqyqtyq júıemen jumys isteýge jáne sóz bostandyǵy, baspasóz bostandyǵy sııaqty quqyqtarǵa ıe bolýǵa ruqsat etilgen. 

Bul model joıylyp bara jatyr degen qorqynysh 2019 jyly demokratııalyq úlken narazylyqtarǵa alyp keldi. Keıbir sherýlerdiń sońy zorlyq-zombylyqqa ulasyp, Beıjiń ulttyq qaýipsizdik týraly zań shyǵardy. Beıjińniń aıtýynsha, jańa zań "búlik shyǵarýdy" maqsat etkenderge qarsy jasalǵan jáne qoǵamnyń ornyqtylyǵyn saqtaıdy.