Búgin májiliste Qazaqstanda tirkelgen partııa ókilderiniń kezdesýi ótip, otyrys barysynda palata tóraǵasy Nurlan Nyǵmatýlın májilis janynan partııaaralyq keńes qurýdy usyndy.

Májiliste ótken jıynǵa «Adal», «Aq jol», «Aýyl» partııalarynyń jáne Qazaqstan Halyq partııasynyń, «Nur Otan» jáne JSDP ókilderi jınaldy.

Qazaqstanda tirkelgen partııa ókilderiniń kezdesýi

– Árqaısymyzdyń alǵa qoıǵan josparlarymyz, mindetterimiz, jumys isteý tásilderimiz ártúrli bolǵanymen, maqsatymyz bir. Ol – Elbasymyz Nursultan Ábishuly Nazarbaevtyń, memleket basshysy Qasym-Jomart Kemeluly Toqaevtyń elimizdi damytý bastamalaryn qoldap, halqymyzdyń ómir sapasyn jaqsartýǵa yqpal etý, úles qosý, – dedi otyrysta Nurlan Nyǵmatýlın.

 

Osy jolda májilis árqashanda qoǵamdyq uıymdarmen, táýelsiz sarapshylarmen, jýrnalıstermen ashyq, qoljetimdi jáne jarııa jumys istep kele jatqanyn alǵa tartqan palata spıkeri:

– Májilis janynan partııaaralyq keńesti uıymdastyrýdy usyna otyryp, biz, eń aldymen, parlamenttik jáne parlamenttik emes partııalardyń dıalogyn keńeıtý úshin jańa múmkindikter ashqymyz keledi. Osy jańa pikirtalas alańynda ázirlenetin talqylaýlar, usynystar, usynymdar zań shyǵarý prosesin odan da tıimdi etýge múmkindik beredi dep úmittenemiz. Jalpy, bizdiń partııaaralyq keńes aıasyndaǵy yntymaqtastyǵymyz ózekti máselelerdi sheshýdiń taǵy bir quraly bola alady, – dedi.

Májilis spıkeriniń pikirinshe, partııaaralyq keńes konsýltatıvtik-keńesshi organ bolýǵa tıis. Sonymen qatar, Nurlan Nyǵmatýlın depýtattyq korpýstyń partııa ókilderiniń qandaı da bir zań jobalary boıynsha jumys toptarynyń quramyna kirýine múddeliligin bildirdi.

– Sizdiń ıdeıalaryńyz, usynystaryńyz is júzinde júzege asyrylýy kerek. Biz birlesken jumysqa daıynbyz. Mundaı yntymaqtastyq parlamenttik emes partııalar úshin de paıdaly bolady dep oılaımyn, – dedi májilis spıkeri kezdesýge qatysýshylarǵa arnaǵan sózinde.

Otyrys barysynda «Aýyl» patrıottyq partııasy tóraǵanyń birinshi orynbasary T. Rahymbekov, Jalpyulttyq sosıal-demokratııalyq partııanyń tóraǵasy A. Rahymjanov jáne «Adal» partııasynyń hatshysy E. Jumaǵazıev májilis tóraǵasy usynǵan bastamany qoldap, bul májilis jumysyndaǵy jańa betburys ekenin aıtty.

Sonymen qatar, Nurlan Nyǵmatýlın Ulttyq qoǵamdyq senim keńesiniń V otyrysynda el prezıdenti Qasym-Jomart Toqaevtyń kótergen tapsyrmalaryna, sonyń ishinde jańa zań jobalaryn ázirleýge qatysty máselelerge nazar aýdardy.

– Biz partııaaralyq keńestiń turaqty jumys isteıtin jumys alańyna aınalýyn qamtamasyz etýimiz kerek. Onda usynymdar ázirlenedi, sodan keıin olar Parlamenttegi zańnamalyq prosestiń barlyq satylarynda paıdalanylatyn bolady, – dedi sózin qorytyndylaǵan májilis tóraǵasy.

Májilistiń baspasóz qyzmeti

"Qamshy" silteıdi
Ilmek sózder: májilis

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir