"Bizdiń talabymyz – ádildik". "Baraholkada" kásipkerler narazylyqqa shyqty

Almatydaǵy "Rahat" bazarynda jumys isteıtin kásipkerler narazylyq aksııasyn ótkizdi. Aıtýlarynsha, Almaty qalasy ákimdigi janyndaǵy Jer komıssııasy "Rahat" bazaryn basqarýshy "TKM" kompanııasyna saýda býtıkteri ornalasqan jerdi jalǵa berý merzimin uzartýdan bas tartyp, astanada tirkelgen "Almaty SRS" fırmasyna jıhaz fabrıkasyn salý úshin 5 jylǵa jalǵa bergen. Sonyń saldarynan ondaǵan jyldar boıy salyq tólep, bıznesteriniń negizin qalaǵan 300-ge jýyq shaǵyn kásipkerge jep otyrǵan nanynan aıyrylý qaýpi tónip tur.

Kásipkerler Almaty qalasy ákimdigi janyndaǵy Jer komıssııasy jerdi "ýchaske zırattyń sanıtarlyq-qorǵaý aımaǵynda ornalasqan" degen negizben 2018 jyly uzartýdan bas tartqanyn aıtady. Alaıda uzamaı jerdi "Almaty SRS"-ke berý týraly sheshim shyqqan. Jıhaz fabrıkasyn salǵysy keletin taraptyń ótinishi Jer komıssııasynda bar bolǵany 3 kúnde qaralǵan.

– Ádette jerdi jalǵa alý sharýasy zańda bekitilgendeı 2 aıda bitpeıdi, aılap, jyldap sozylady. Al "Almaty SRS"-tiń ótinishi 3-aq kúnde qaralady eken. Bul qalaı?, –  degen shaǵyn kásip ıeleri daýdyń artynda yqpaldy adamdar tur dep sanaıdy.

Sonymen qatar narazy top jer ınvestısııalyq jobany júzege asyrý maqsatynda berilgenin jetkizip, "ınvestısııalyq jobanyń bazarǵa qandaı qatysy bar jáne zamanaýı saýda ortalyǵyn bul jerdi burynan basqaryp kele jatqan kompanııa da iske asyra alady" dep ashynady.

Olardyń sózinshe, memlekettik menshiktegi jerdi ınvestısııalyq jobany júzege asyrý maqsatynda berý máselesi Aımaqtyq úılestirý keńesinde qaralýǵa tıis. "Almaty SRS"-tiń jobasy keńeste qaralmaǵan.

Kásipkerlerdiń kóńilindegi kezekti kiltıpan – "baraholkidegi 25-ten astam bazar, saýda ortalyǵy ornalasqan aımaqta fabrıka salýdyń qajettiligi bar ma?" degen másele.

Zırattyń sanıtarlyq-qorǵaý aımaǵy, Qarasý ózeniniń sý-qorǵaý aımaǵynda óndiris obektisin salý SNıP talaptaryna sáıkes pe? О́ndiris obektileri úshin bólingen ındýstrıaldyq aımaqta jıhaz fabrıkasyna oryn tabylmady ma? Álde, bul bıznesti reıderlik jolmen tartyp alýdyń qıturqy tásili me? Bul jaǵy ázirge belgisiz.

Kásipkerler, memlekettik atqarýshy organdar jerdi "TKM" JShS-nen alyp, "Almaty SRS"-ke bergende 300-den astam adamnyń múddesi múlde nazardan tys qaldyryp otyrǵanyn aıtady.

– Qabyldaǵan sheshimderi qısynǵa kelmeıtin, zańǵa qaıshy bolsa da, Almaty qalasy mamandandyrylǵan ekonomıkalyq sotynyń áreketi kúmándi. "TKM" JShS-niń talaptary boıynsha barlyq ister bir ǵana sýdıa Qazymbetovanyń qaraýyna túsip otyrǵan. Isterdi avtomatty bólý júıesi sanaly túrde bir ǵana sýdıaǵa bólýi kúmán keltiredi. Barlyq ister boıynsha bazardyń isi 3 jyl boıy bir ǵana sýdıanyń aldyna kelip, ol talaptardy qanaǵattandyrýsyz qaldyrý týraly sheshim qabyldaýmen keledi, – deıdi narazylyq aksııasyna jınalǵandar.

Kásipkerler bul iste Konstıtýsııa, Jer kodeksi, Kásipkerlik kodeksiniń talaptary men Úkimettiń ózge qaýlylary eskerilmeı keledi dep otyr.