Qurylysy aıaqtalmaǵan ǵımarattan qulaǵan polıseıdiń týysy Saǵyntaevtan kómek suraıdy

Áleýmettik jelide "ýchaskelik polıseı bolyp jumys isteıtin baýyrym qyzmet barysynda shatyrdan qulap, aýyr jaraqat aldy. Almaty ákimi Baqytjan Saǵyntaevtan kómek suraımyn" degen áıeldiń beıneúndeýi taralyp jatyr.

Beıneúndeýdegi áıeldiń aıtýynsha, oqıǵa 28 aqpanda Almaty qalasy Alataý aýdany Zerdeli yqshamaýdanynda bolǵan. Qurylysy bitpegen úılerdiń tóbesinde balalardyń oınap júrgeni týraly aqparat alǵan kezekshilikte bolǵan ýchaskelik polısııa qyzmetkeri Halmyrzaev Temirbek balalarǵa tómenge túsýin, bul oınaıtyn alań emes ekenin túsindirgen. Alaıda qyzmettik mindetterin atqarý barysynda ózi joǵary qabattan qulap, búginde aýyr halde jatyr.

"Soǵan baılanysty, sizden Baqytjan Saǵyntaev myrza, qandaı dáriger mamandardyń kómegi qajet ekenin anyqtap, ómirine arasha túsýińizdi suraımyn. Artynda 3 balasy, aıaǵy aýyr áıeli, 80 kelip qalǵan qart anasy Alladan aman qalýyn tileýde. Sondaı-aq birneshe jyldan beri úıdi bitirmegen qurylys mekemesi basshylyǵyn jaýapqa tartýyńyzdy suraımyn. Turǵyndardyń aıtýynsha, osy mekenjaıda buǵan deıin birneshe adam qulap mert bolǵan. Osyǵan beıjáı qaraǵan Alataý aýdany ákimin jáne oǵan jaýapty tulǵalardy jaýapqa tartýyńyzdy ótinemin" delingen áıeldiń beıneúndeýinde.

Almaty qalasy polısııa departamenti ıývenaldyq polısııa qyzmetkeri 16-17 jastaǵy jasóspirimdermen profılaktıkalyq áńgime barysynda aıaǵy taıyp, tómengi qabatqa qulap ketkenin rastap, onyń jaǵdaıy týraly málim etti.

"Búginde polıseıge ota jasaldy, alaıda onyń jaǵdaıy áli de aýyr.  Kámeletke tolmaǵandardyń ata-anasyna ákimshilik kodekstiń 127-baby (kámeletke tolmaǵan adamdy tárbıeleý jáne oǵan bilim berý, onyń quqyqtary men múddelerin qorǵaý jónindegi mindetterdi oryndamaý) boıynsha hattama toltyryldy. Jasósipirimder zardap shekken joq" delingen departament habarlamasynda.