Túrkistanda qaıǵyly jaǵdaıdyń jaı-japsary belgili boldy

Túrkistan qalasynda qaıtys bolǵan bir otbasy músheleriniń ólimi ystan ýlaný nátıjesinde bolǵany anyqtaldy. Bul týraly óńirlik kommýnıkasııalar qyzmetinde ótken brıfıngte habarlandy.

Oblystyq polısııa departamentiniń málimdeýinshe, máıitterge qaraý júrgizý barysynda denelerinde eshqandaı zorlyq-zombylyq belgileri anyqtalmaǵan.

– Ys tıip qaıtys bolǵan bes adamnyń denesin otbasynyń tanystary tapty. Polısııanyń boljamyna sáıkes, qaıǵyly jaǵdaı áıel jumystan kelgen soń bolǵan, – dedi oblystyq polısııa departamenti bastyǵynyń birinshi orynbasary Ábdýǵanı Seıdýálıev.

Onyń aıtýynsha, qaıtys bolǵandar uıyqtap úlgermesten ys tıip qaıtys bolýy múmkin.

– Habarlama 27 aqpan kúni keshke saǵat 18:12-de tústi. Áıeldiń bazarda birge isteıtin áriptesi 27-si kúni jumysqa shyqpaǵan soń izdep, úıine balasyn jibergen. Balasy úıinde eshkim joq dep qaıtyp kelgen soń, jumystan keıin kúıeýin jibergen. Sebebi ol jumysqa kelmegen, ózderiniń kezdesetin jospary bolǵan eken. Kúıeýi úıdiń terezesinen ishte jaryq janyp turǵanyn jáne áıeldiń jatqanyn kórip habarlaǵan.

Boljam boıynsha, qaıtys bolǵan jandar 26 aqpanda uıyqtap úlgermegen. О́ıtkeni sheshinip, tósekke de jatpaǵan. Keshki ýaqytta peshti qosyp, tamaqtanyp bolǵan soń qaıǵyly jaǵdaı boldy dep boljap otyrmyz, – dedi ol.

Otbasy óz menshigindegi úsh bólmeli baspanada ýaqytsha turyp jatqan. Onyń janynda úlken úıdiń qurylysy júrip jatyr.

Oqıǵaǵa baılanysty sotqa deıingi tergep-tekserý amaldary júrgizilip jatyr. Sot-medısınalyq saraptama taǵaıyndaldy.

О́ńirge gaz júrgizýge jaýapty "GazTransGazAımaq" AQ Túrkistan oblystyq óndiristik fılıalynyń dırektory Shalqar Omarbekovtyń aıtýynsha, turǵynúı tabıǵı gazben jabdyqtalǵan. Irandyq qazandyq ornatylǵan.

Otbasy 2020 jyly tehnıkalyq shart alýǵa usynys bergen. Sol qujattar negizinde gaz paıdalanýǵa ruqsat berilgen.

Tekserý kezinde oqıǵa bolǵan jerde tehnıkalyq sıpattamalardyń buzylǵany anyqtaldy. Mamannyń aıtýynsha, montaj jumystary tehnıkalyq-oryndaý qujattaryna sáıkes kelmeıdi.

– Montajdaý jumystaryn gazdandyrýmen aınalysatyn "Gaz qubyry-2050" degen lısenzııasy bar merdiger mekemesi júrgizgen. Úıge úsh gaz qubyry kirgen. Biri gaz plıtasyna, biri "ıran" peshine baǵyttalǵan. Gaz sıgnalızatory joq, – dedi Shalqar Omarbekov.

Buǵan deıin Túrkistan oblysynda jekemenshik úıden ys tıgen bes adamnyń denesi tabylǵany habarlanǵan.