Almatyda belsendiler 10 jarym saǵattyq qorshaýdan keıin bosatyldy

 

Belsendilerdi qoıa bergen kezde dalada -10 gradýs bolyp seziletin -5 gradýstyq sýyq bolǵan.

 

Belsendiler mıtıngi saǵat 12:00-de bastalǵan. Olar Balýan Sholaq atyndaǵy sport saraıy aldyna jınalyp, ary qaraı Respýblıka alańyna deıin júrip ótpek bolǵan. Alaıda belsendiler mıtıng orny retinde belgilengen jerge kelgen sátte polısııa men arnaıy jasaq sport saraıynyń aldyna jibermeı, Abaı men Baıtursynov kósheleriniń qıylysynda "kettlıng" ádisimen qorshaýǵa alyp, ustap turdy.

Qorshaýda turǵan belsendiler bir sátte arnaıy jasaqpen qaqtyǵysqa túsip, ásker qorshaýdy tartylta tústi. Osy sátte belsendi áıeldiń "OMON-dar qabyrǵamdy syndyrdy" dep aıqaılaǵan daýsy shyqty. Artynsha jedel járdem kóligi kelip, belsendini alyp ketti. Uzamaı taǵy bir áıel densaýlyǵyna shaǵymdanyp, qabyrǵasy aýyryp turǵanyn aıtty.

Narazy top dybys ulǵaıtqyshpen "jer satylmasyn", "nesıe amnıstııasy jarııalansyn", "saıası tutqyndardy bosatylsyn" Nazarbaev, ket", "Eýroparlament qarary oryndalsyn" dep urandatyp turdy. Olarǵa jaýap retinde azamattyq kıimdegi birneshe adam "Mamaı, qarabet, Mamaıǵa senbeńder" dep aıqaılap júrdi. О́zin "kópbalaly anamyn" dep tanystyrǵan belgisiz áıeldiń belsendilerdi taraýǵa úndedi.

Belsendiler qorshaýda turǵan segizinshi saǵatta polıseıler belsendi Abzal Dostııarovty ustap alyp ketti.

Qorshaýdaǵylarǵa jany ashyǵan azamattar arasynda syrttan as-sý salynǵan paketter laqtyryp jatty. Ájethanaǵa barǵysy keletinderdi polısııa bir-birlep aparyp, qaıtadan qorshaýdyń ishine kirgizdi. Májilis saılaýy kúngi mıtıngte belsendilerge ájethanaǵa barýǵa ruhsat bermeı, keıbiri sol jerde qajetin óteýge májbúr bolǵan.

 

Qorshaýdan bosaǵan belsendilerdiń bir bóligi tarasa, bir bóligi Abzal Dostııarov qamalǵan Bostandyq aýdanynyń polısııa bólimine ketken.